ÜST-ün ekspert komissiyası yanvarın 14-də Çinə səfər edəcək
Cenevrə, 11 yanvar, AZƏRTAC
Ümumdünya Səhiyyə Təşkilatı (ÜST) koronavirus epidemiyasının yaranma səbəblərini araşdırmaq üçün yanvarın 14-də Çin Xalq Respublikasına ekspertlərdən ibarət beynəlxalq komissiya göndərəcək.
AZƏRTAC xəbər verir ki, Çinin müvafiq qurumları tərəfindən belə bir səfər üçün müvafiq icazə artıq verilib. Yanvarın 14-dən başlanacaq ekspedisiya ilə bağlı əlavə detallar açıqlanmayıb.
On nəfərdən ibarət heyətin Çinə səfəri 5-6 həftəni əhatə edəcək (həmin dövrün iki həftəsi karantin olmaq şərti ilə) və epidemiyanın ilk olaraq başladığı Hubey vilayətinin paytaxtı Uxan şəhəri diqqət mərkəzində olacaq. Ekspertlər rəylərini öz müşahidələrinə, eləcə də Çin mütəxəssisləri tərəfindən heyvan və insanlardan toplanmış nümunələrə əsasən verəcəklər.
Qeyd edilməlidir ki, koronavirus pandemiyasının yayılması ilə bağlı məlumatları beynəlxalq ictimaiyyətdən gizlətməkdə ittiham edilən Çin hökuməti və ÜST arasında ekspert komissiyasının faktaraşdırıcı missiyasının epidemiyanın ilk yayıldığı regiona səfərinə dair müzakirələr uzun müddətdir aparılır. Komissiyanın səfəri yanvarın əvvəlinə planlaşdırılsa da, müəyyən bürokratik əngəllərdən dolayı, ekspertlərin ayın ortasında Çinə yollanması gözlənilir.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
