Vergi Xidmətinin əməkdaşları “Avrasiya vergi həftəsi” beynəlxalq elmi-praktik konfransında iştirak ediblər
Bakı, 31 mart, AZƏRTAC
MDB vergi xidmətləri rəhbərlərinin Koordinasiya Şurasının XXVII iclasının protokolunun icrası məqsədilə Rusiya Federal Vergi Xidməti tərəfindən “Avrasiya vergi həftəsi” beynəlxalq elmi-praktik konfransı çərçivəsində MDB dövlətlərinin vergi xidmətləri, MDB İcraiyyə Komitəsi və Rusiya Federasiyası hökuməti yanında Maliyyə Universitetinin birgə iştirakı ilə “MDB-yə üzv dövlətlərdə rəqəmsal aktivlərin vergitutmasının aktual problemləri” mövzusunda videokonfrans formatında seminar-praktikum keçirilib.
Dövlət Vergi Xidmətindən (DVX) AZƏRTAC-a bildirilib ki, seminarda “Dünyada rəqəmsal vergitutma”, “Kriptoaktivlər sferasında qanunvericiliyin inkişaf meylləri”, “Fiziki şəxslərin rəqəmsal işarələr (tokenlər) ilə əməliyyatları zamanı gəlirlərinin vergitutması” və digər aktual mövzularda məruzələr dinlənilib.
Seminarda Azərbaycandan DVX-nin Tədris Mərkəzinin rəisi vəzifəsini icra edən Mirəli Kazımov, mərkəzin Elm, innovasiya və əməkdaşlıq şöbəsinin rəisi Nazim Əliyev, Vergi Xidmətinin Rəqəmsal vergi inzibatçılığı baş idarəsinin Onlayn kassa aparatlarının monitorinqi şöbəsinin rəisi Zaman Məmmədov, Vergi siyasəti baş idarəsi Xarici ölkələrin vergi qanunvericiliyi və inzibatçılığının öyrənilməsi, Fiziki şəxslərlə iş şöbəsinin əməkdaşı Aqşin Sadıqov və Beynəlxalq əlaqələr baş idarəsinin əməkdaşı Esmira Məmmədova iştirak ediblər. M.Kazımov “Kriptovalyutalar ilə aparılan əməliyyatlar zamanı törədilən vergi hüquq pozuntuları ilə mübarizənin aktual problemləri” mövzusunda çıxış edib.
Bundan başqa, DVX-nin Tədris Mərkəzinin rəisi vəzifəsini icra edən M.Kazımov və Tədris Mərkəzinin şöbə rəisi Nazim Əliyev Rusiya Federasiyası hökuməti yanında Maliyyə Universitetinin “Korrupsiyaya qarşı səmərəli mübarizə iqtisadi fəaliyyətdə şəffaflığın təmin edilməsinin həlledici amili kimi” mövzusu üzrə videokonfrans formatında təşkil etdiyi beynəlxalq “dəyirmi masa”da da iştirak edib.
Tədbirdə MDB ilə yanaşı, Avropa İttifaqının və digər xarici dövlətlərin korrupsiya cinayətlərinə qarşı mübarizə üzrə mütəxəssislərinin, elm-təhsil müəssisələrinin ekspertlərinin məruzələri dinlənilib, müzakirələr aparılıb.
Bölmənin digər xəbərləri
