Vətən müharibəsi qazisi: Əsgərimizin, zabitimizin gözündə qorxu yox idi VİDEO
Xaçmaz, 15 oktyabr, Elxan Yusifli, AZƏRTAC
Baş leytenant Taryel Ağasıyev Vətən müharibəsində Cəbrayıl, Füzuli və Xocavənd uğrunda gedən şiddətli döyüşlərdə qəhrəmanlıqla savaşıb. Xocavənddə ağır yaralanıb. Döyüşlərdə göstərdiyi şücaətlərə görə altı medalla təltif olunub.
AZƏRTAC-ın bölgə müxbiri xəbər verir ki, Ağasıyev Taryel Bəxtiyar oğlu 1997-ci il martın 24-də Quba rayonunun Digah kəndində doğulub. Azərbaycan Dövlət Bədən Tərbiyəsi və İdman Akademiyasında ali təhsil alıb. Ardınca Azərbaycan Ordusunun Təlim və Tədris Mərkəzində ehtiyat zabit hazırlığı kursunu müvəffəqiyyətlə bitirərək, 2019-cu ildə leytenant hərbi rütbəsi alıb.
“Mən Vətən müharibəsi başlayanda Azərbaycan Silahlı Qüvvələrinin “N” saylı hərbi hissəsində taqım komandiri vəzifəsində xidmət edirdim. 2020-ci ilin 27 sentyabrında düşmənin təxribatlarına cavab olaraq bizim haqq mübarizəmiz başladı. Mən də müharibənin ilk günündən döyüşlərə qatıldım. İlk döyüş tapşırığımız Cəbrayıl rayonu istiqamətində oldu. Çətin idi, amma, eyni zamanda, çox sevindirici idi, torpaqlarımızı azad edirdik. Müdafiə xətlərinin yarılması asan deyildi. Hərbçilərimiz çox böyük qəhrəmanlıq nümayiş etdirirdi. Mən 44 gün davam edən Vətən müharibəsinin 30 gününü döyüşlərdə iştirak etdim. Heç bir əsgərimizin, zabitimizin gözündə qorxu yox idi”, - deyə qazi Taryel Ağasıyev söyləyib.
Taryel müalicəsi başa çatandan sonra daha iki il xidmətini davam etdirib. 2022-ci ildə baş leytenant rütbəsi alıb. Döyüşdə yaralanan zaman aldığı xəsarətlər səbəbindən xidmətini tam yerinə yetirə bilmədiyi üçün Silahlı Qüvvələrdən ehtiyata buraxılıb. 3-cü qrup Vətən müharibəsi əlilidir.
“Xocavəndin Qırımızı Bazar qəsəbəsi uğrunda gedən döyüşlərdə yaralandım. Artıq düşmən Hadrutdan qovulmuşdu. Ordumuz hər gün irəliləyirdi. Oktyabrın 27-də növbəti döyüş tapşırığını yerinə yetirərkən düşmənin snayper gülləsinə tuş gəldim. Sol çiyin nahiyəmdən ağır yaralandım. Meşəlik və çox çətin relyefli ərazi idi. Buna baxmayaraq, tapşırıq uğurla yerinə yetirildi. Amma mənimlə bərabər yaralananlar və şəhidlərimiz oldu. Döyüşlər şiddətli olduğundan məni dərhal ərazidən təxliyə etmək mümkün olmadı. Səhər yaralanmışdım. Gecəyədək döyüş gedən ərazidə qaldım. Yalnız gecə yarısı mənə ilkin tibbi yardım göstərilib və hospitala çatdırılmışam”, - deyə Taryel Ağasıyev bildirib.
Döyüşlərdə göstərdiyi şücaətlərə görə Taryel Ağasıyev "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə", "Cəsur döyüşçü", “Hərbi xidmətdə fərqlənməyə görə” 3-cü dərəcəli və "Vətən müharibəsi iştirakçısı" medallarına layiq görülüb.
O, hazırda müəllim kimi gənclərin vətənpərvərlik ruhunda böyüməsi istiqamətində çalışır. Qəhrəman döyüşçü şəhid Hikmət Hüseynov adına Quba şəhər 4 saylı humanitar fənlər təmayüllü məktəb-liseydə "Çağırışaqədərki hazırlıq” fənnini tədris edir.
Bölmənin digər xəbərləri
