Vətən müharibəsi qazisi: Torpağımızı canımız-qanımız bahasına olsa belə düşmənə verməzdik VİDEO
Samux, 11 oktyabr, Vüsalə Cənnətova, AZƏRTAC
Şanlı Zəfərlə nəticələnən Vətən müharibəsində Daxili İşlər Nazirliyinin Daxili Qoşunlarının mənsublarının da qəhrəmanlığı danılmazdır. Daxili Qoşunların mərdlik, vətənpərvərlik nümunəsi göstərən, düşmənlə ağır döyüşlərə qatılan 66 hərbçisi şəhid olub, 346 nəfər isə yaralanıb. AZƏRTAC-ın bölgə müxbiri xəbər verir ki, qazi Fəzamir Məmmədov da sağlamlığını Vətən yolunda qurban verən igidlərimizdəndir.
Fəzamir Pazıl oğlu Məmmədov 1993-cü il yanvarın 9-u Samux rayonunun Sarıqaya kəndində anadan olub. Orta məktəbi də doğma kənddə oxuyub. 2011-ci ilin yanvar ayında isə Daxili Qoşunlarda müddətli həqiqi hərbi xidmətə yollanıb. Hərb sahəsinə marağı böyük olan Fəzamir Məmmədov 2013-cü ildən Daxili Qoşunlara müddətdən artıq həqiqi hərbi xidmətə qəbul olunub. Vətən müharibəsinin ilk günlərindən döyüşə qatılan Fəzamir pulemyotçu kimi igidlik göstərib. O, Murovdaq istiqamətində, Hadrut, eləcə də Xocavəndin bir sıra kəndləri, Cəbrayılın, Füzulinin düşməndən azad edilməsi uğrunda döyüşlərdə iştirak edib.
“Torpaqlarımızın işğal altında olması bizim üçün yara idi. Bu yaranı sağaltdıq, qara ləkəni üzərimizdən götürdük. İlk döyüşüm Murovdağ yüksəkliyində olub. Cəbrayıl, Hadrut və digər istiqamətlərdə gedən döyüşlərdə də var gücümüzlə mübarizə apardıq”, - deyə Fəzamir Məmmədov bildirir. Müsahibimiz söyləyir ki, 44 gün ərzində döyüş yoldaşları ilə birgə ancaq Vətən torpaqlarını düşmən tapdağından azad etmək, vəzifə borcunu ləyaqətlə və vicdanla yerinə yetirərək, orduya bəslənən ümidləri doğrultmaq üçün mübarizə aparıb.
Fəzamir Məmmədov Füzuli şəhərində gedən döyüşlərdə ağır yaralanıb. Üçüncü qrup əlildir. “Füzuli şəhərində düşmənin hərbi hissəsini, heyətini məhv elədik. Bayrağı yüksəkliyə sancdıq. O biri taborumuz da günbəzin yanındakı yüksəkliyə bayraq sancmışdı. Düşmən bayrağımızı görüb qıcıqlanırdı. Bizi 3 gün artilleriya atəşinə tutdular, şəhidlərimiz oldu. Üç-dörd gün dayanmadan döyüş getdi. Düşmən istəyirdi ki, şəhəri geri alsın, amma torpaq bizim torpaqdır, onu canımız-qanımız bahasına belə olsa düşmənə verməzdik. Oktyabrın 16-da orada yaralandım”, - deyən Fəzamir Məmmədov onu da bildirir ki, şanlı Qələbənin, bu qələbədə pay sahibi olmağın sevincini böyük qürurla yaşayıb.
Silahlı Qüvvələrin Ali Baş Komandanı, Prezident İlham Əliyevin müvafiq sərəncamlarına əsasən, Fəzamir Məmmədov döyüşlərdə göstərdiyi şücaətlərə görə “Vətən müharibəsi iştirakçısı”, “Cəsur döyüşçü”, “Kəlbəcərin azad olunmasına görə”, “Füzulinin azad olunmasına görə”, “Cəbrayılın azad olunmasına görə, “Şuşanın azad olunmasına görə” medallarına layiq görülüb.
Bölmənin digər xəbərləri
