Vətəndaşların müraciətlərinə ən geci 15 iş günü müddətində baxılmalıdır
Bakı, 13 noyabr, AZƏRTAC
Azərbaycan Respublikasının Prezidenti İlham Əliyev “Vətəndaşların müraciətləri haqqında” Azərbaycan Respublikasının Qanununun tətbiqi barədə Fərman imzalayıb.
AZƏRTAC xəbər verir ki, qanunda vətəndaşların müraciətlərinə baxılması müddətləri müəyyənləşdirilir. Belə ki, müraciətlərə ən geci 15 iş günü, əlavə öyrənilmə və yoxlanılma tələb edən müraciətlərə isə ən geci 30 iş günü müddətində baxılmalıdır. Qanuna əsasən, müraciətə baxılması üçün əlavə məlumatların əldə edilməsi və ya aidiyyəti üzrə sorğu göndərilməsi lazım gəldikdə, müraciətə baxan vəzifəli şəxsin müraciətə baxılması müddətini ən çoxu 30 iş günü uzatmaq hüququ var.
Qanunda müraciətlərə baxılması zamanı vətəndaşların hüquqlarına dair müddəalar da yer alır. Vətəndaşa müraciətin tam və hərtərəfli araşdırılması üçün əlavə sənəd və materiallar təqdim etmək, müraciətə baxılması barədə yazılı cavab və ya müraciətin aidiyyəti üzrə göndərilməsinə dair məlumat almaq, müraciət barəsində qəbul edilmiş qərarla razılaşmadıqda həmin qərardan inzibati və ya məhkəmə qaydasında şikayət vermək hüququ və digər hüquqlar verilir. Əgər müraciətdə ailə və şəxsi həyata aid sirr olan, habelə peşə və ya kommersiya sirri olan sənədlər, məlumatlar varsa, vətəndaş onların məxfiliyinin təmin olunmasını tələb edə bilər.
Bölmənin digər xəbərləri
