VOLEYBOL ÜZRƏ QADINLAR ARASINDA AZƏRBAYCAN ÇEMPİONATININ ƏSASNAMƏSİNƏ DƏYİŞİKLİK EDİLMİŞDİR
AZƏRTAC xəbər verir ki, Azərbaycanın voleybol üzrə qadınlar arasında ölkə çempionatının əsasnaməsinə dəyişiklik edilmişdir. Bu barədə Azərbaycan Voleybol Federasiyası (AVF) Rəyasət Heyətinin iclasında AVF-nin baş katibi Elşən İsmayılov məlumat vermişdir.
Artıq növbəti mövsümdən qadınlar arasında ölkə çempionatında 10-12 komanda mübarizə aparacaqdır. Daha zəif komandaları stimullaşdırmaq məqsədi ilə yığmanın əsasını təşkil edən “Azərreyl”, “Rabitə”, “Nəqliyyatçı” və “Lokomotiv” klubları çempionata daha gec qoşulacaqlar.
Qalan komandalar isə bir-birilə yarışaraq öz aralarında ən güclü dördlüyü müəyyənləşdirəcəklər. Məhz bundan sonra bu 4 komanda, digər 4 komanda ilə birlikdə xüsusi liqanın oyunlarını təşkil edəcəklər. E.İsmayılov demişdir ki, bu mərhələnin necə adlandırılması hələ müzakirə olunmamışdır. Bu ya superliqa, ya da peşəkar liqanın oyunları olacaqdır. Lakin biz bu mərhləni sponsorluq edəcək şirkətlərdən birinin adı ilə adlandırmağı nəzərdə tutmuşuq.
Həmin mərhələnin oyunlarından sonra ən güclü komandalar Azərbaycanı beynəlxalq yarışlarda təmsil edəcəklər.
E.İsmayılov vurğulamışdır ki, birinci liqanın oyunlarında iştirak edəcək komandalar üzvlük haqqından azad olacaqlar.
Bölmənin digər xəbərləri
