Volodimir Zelenski həftə ərzində Donald Trampla görüşəcəyini təsdiqləyib
Kiyev, 13 oktyabr, AZƏRTAC
Ukrayna Prezidenti Volodimir Zelenski ABŞ Prezidenti Donald Trampla görüşünü təsdiqləyib.
AZƏRTAC xəbər verir ki, Zelenski bunu Kiyevdə Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallasla birgə mətbuat konfransında söyləyib.
“Mən bu həftə Vaşinqtonda Prezident Trampla görüşəcəyəm. Düşünürəm ki, Trampa təklif etmək istədiyim addımların ardıcıllığını müzakirə etməliyik”, - deyə Zelenski bildirib.
Zelenski oktyabrın 17-də Vaşinqtona gedə biləcəyinə ümid edir.
“Mənim üçün vacib olan başqa görüşlərim də var. Bəzi hərbi layihələr önəmlidir. Bu məsələ ilə bağlı təfərrüatları bölüşə bilmərəm”, - deyə Prezident vurğulayıb.
Ukrayna Prezidenti, həmçinin senatorlar və Konqres üzvləri ilə görüşlərinin planlaşdırıldığını söyləyib.
“Əsas mövzu hava hücumundan müdafiədir. Yeri gəlmişkən, mənim enerji şirkətlərinin nümayəndələri ilə də görüşüm olacaq. Bu lazımdır, Prezident Trampın təklifi idi. Mənim konkret hərbi şirkətlərlə də görüşlərim olacaq, çünki konkret ehtiyaclar var ki, indi müxtəlif formatlarda həll olunur. Əsas mövzular hava hücumundan müdafiə və Rusiyaya təzyiq göstərmək üçün uzaq məsafəli imkanlarımızdır”, - deyə Ukrayna Prezidenti vurğulayıb.
Bölmənin digər xəbərləri
