VYANADA DAHİ AZƏRBAYCAN BƏSTƏKARI ÜZEYİR HACIBƏYOVUN ABİDƏSİNİN AÇILIŞ MƏRASİMİ
Mərasimdə Azərbaycanın mədəniyyət və turizm naziri Əbülfəs Qarayevin rəhbərlik etdiyi nümayəndə heyəti, Avstriyanın dövlət və hökumət rəsmiləri, parlamentin üzvləri, Vyana ictimaiyyətinin nümayəndələri, Azərbaycan səfirliyinin əməkdaşları, Avstriya-Azərbaycan Dostluq Cəmiyyətinin üzvləri, sənət adamları, elm və mədəniyyət xadimləri, Avstriyada yaşayan, işləyən və təhsil alan soydaşlarımız iştirak etmişlər.
Ölməz bəstəkarın “Koroğlu” operasının qəlbləri riqqətə gətirən uvertürası səsləndirildi.
Nazir Əbülfəs Qarayev, Vyana əyalət parlamentinin sədri, professor, xanım Ştubenfall və abidənin müəllifi, xalq rəssamı, akademik Ömər Eldarov mərasim iştirakçılarının alqışları altında dahi bəstəkarın qara qranitdən yonulmuş abidəsinin üzərindən örtüyü götürdülər. Abidənin postamenti üzərində alman və Azərbaycan dillərində aşağıdakı yazı həkk olunmuşdur: “Böyük Azərbaycan bəstəkarı Üzeyir Hacıbəyov (1885 Şuşa - 1948 Bakı).
Azərbaycan bəstəkarı və dramaturqu, Şərqin musiqili teatrının və konservatoriyasının banisi olmuşdur və həmçinin müsəlman Şərqində operanın əsasını qoymuşdur. Azərbaycanın Avstriyadakı səfirliyinin təşəbbüsü ilə bu abidə ona ehtiram olaraq, 30 may 2006-cı ildə ucaldılmışdır. Müəllif heykəltəraş Ömər Eldarovdur”.
Abidənin önünə Azərbaycan hökuməti adından əklil qoyuldu. Mərasim iştirakçıları heykəlin ətrafına gül-çiçək düzdülər.
Açılışda çıxış edən nazir Əbülfəs Qarayev Azərbaycan Prezidenti İlham Əliyevin mərasim iştirakçılarına səmimi təbrikini və Avstriya hökumətinə təşəkkürünü çatdırdı. O, xalqımızın misilsiz, zəngin musiqi mədəniyyəti xəzinəsinə əvəzsiz töhfə vermiş ulu sənətkarımıza dahi Motsartın vətənində abidə ucaldılmasına şərait yaradılmasına görə Avstriya xalqına və dövlətinə dərin ehtiramını və təşəkkürünü ifadə edərək bildirdi ki, yaxın gələcəkdə Bakının meydanlarından birində dahi Avstriya bəstəkarı Motsartın şərəfinə abidə ucaldılacaqdır. Vyanada və Bakıda ucaldılan abidələr mədəniyyət sahəsində Avstriya-Azərbaycan əlaqələrinin yüksək səviyyəsinin rəmzinə çevriləcəkdir. Nazir xüsusilə vurğuladı ki, Üzeyir Hacıbəyovun abidəsinin açılışı Avstriya ilə Azərbaycan arasında ənənəvi dostluq münasibətlərinin, qarşılıqlı anlaşmanın dinamik inkişafını, mədəniyyətlərin qaynayıb-qarışmasını bir daha sübut edən əlamətdar hadisədir.
Təbrik sözü söyləyən Vyana əyalət parlamentinin sədri xanım Ştubenfall dedi ki, bu abidənin Vyanada açılışı Avstriya və Azərbaycan arasında ənənəvi dostluq əlaqələrinin, xüsusilə mənəvi əməkdaşlıq əlaqələrinin gücləndiyini və inkişaf etdiyini göstərir. O, fəxrlə bildirdi ki, yaxın gələcəkdə Vyana kamera teatrı dahi Azərbaycan bəstəkarı Üzeyir Hacıbəyovun “Arşın mal alan” operettasını tamaşaya qoyacaq və öz repertuarında əbədiləşdirəcəkdir.
Çıxış edənlər Üzeyir Hacıbəyovun doğma xalqının mədəni irsi ilə yaxından bağlılığını, millətini, Vətənini ürəkdən sevən, xalq musiqi qaynaqlarından bəhrələnməklə klassik musiqisi inciləri yaradan dahi sənətkar olduğunu dəfələrlə vurğuladılar.
Abidənin açılış mərasimi Azərbaycan incəsənət ustalarının çıxışları ilə yekunlaşdı. Azərbaycan Dövlət Uşaq Filarmoniyasının “Qarabağ bülbülləri” ansamblının ifasında “Qarabağ şikəstəsi”, “Heyratı” ritmik muğamları, əməkdar artist, istedadlı qarmonçalan Zakir Mirzəyevin ifa etdiyi Üzeyir bəyin bəstələdiyi rəqsləri, Motsartın “Türk marşı” mərasim iştirakçıları tərəfindən alqışlarla qarşılandı.
Mərasim başa çatdıqdan sonra iştirakçılar Azərbaycanın Avstriyadakı səfirliyinin Respublika günü münasibətilə təşkil etdiyi ziyafətə toplaşdılar. Burada Azərbaycanın incəsənət ustaları geniş bayram konserti ilə çıxış etdilər.
