Vyetnamda “Bualoy” qasırğası qurbanlarının sayı 19 nəfərə çatıb
Bakı, 30 sentyabr, AZƏRTAC
Vyetnamda “Bualoy” qasırğası nəticəsində ölənlərin sayı 19-a çatıb, daha 21 nəfər hələ də itkindir.
AZƏRTAC xəbər verir ki, bu barədə çərşənbə axşamı Vyetnam hökuməti məlumat yayıb.
“Bualoy” bu il ölkəni vuran ən dağıdıcı qasırğadır. Davamlı yağışlar Hanoy və şimal əyalətlərində güclü daşqınlara səbəb olub.
Bazar ertəsi “Bualoy” qasırğası Vyetnamın şimal-mərkəzinə çatıb.
Hökumət 88 nəfərin yaralandığını, ilk növbədə Nqean və Hatin əyalətlərində 100 mindən çox evin zərər gördüyünü, 10 min hektardan çox çəltik və digər əkin sahələrinin su altında qaldığını bildirib.
Milli Meteorologiya Agentliyi son 24 saat ərzində Vyetnamın bir sıra bölgələrində yağıntının miqdarının 300 millimetri keçdiyini bildirib, sürüşmə və daşqınlar barədə xəbərdarlıq edib. Paytaxt Hanoyda şimşək çaxması ilə müşayiət olunan davamlı leysan yağışları səbəbindən küçələri su basıb, şəhərin bir çox ərazilərində nəqliyyatın hərəkəti iflic olub.
Dövlət mediasının məlumatına görə, Vyetnamın şimal və mərkəzi hissəsində bir neçə kənd çərşənbə axşamı günü su altında qalıb, nəqliyyat iflic olub, elektrik enerjisi kəsilib.
Vyetnam Cənubi Çin dənizində uzun sahil xəttinə malikdir ki, bu da onu tez-tez güclü yağışlar gətirən və daşqınlara səbəb olan qasırğalara həssas edir.
Bölmənin digər xəbərləri
