Xalqımızın keçdiyi müstəqillik yolu hər bir azərbaycanlıda iftixar hissi doğurur
Bakı, 21 yanvar (AZƏRTAC). Maliyyə Nazirliyində və onun strukturuna daxil olan qurumlarda, həmçinin yerli maliyyə orqanlarında 20 Yanvar faciəsinin ildönümünə həsr olunmuş anım mərasimləri keçirilmişdir.
Nazirliyin mətbuat xidmətindən AZƏRTAC-a bildirmişlər ki, mərasimlərdə xalqımızın keçdiyi müstəqillik yoluna bir daha nəzər salınmış, mübarizələrlə dolu bu yolun hər bir azərbaycanlıda iftixar hissi doğurduğu, şəhidlərin əziz xatirəsinin ürəklərdə daim yaşayacağı bildirilmişdir. Qeyd edilmişdir ki, ümummilli lider Heydər Əliyevin təşəbbüsü ilə 20 Yanvar hadisələrinin əsl səbəblərinin araşdırılması və dünya ictimaiyyətinə çatdırılması, faciə qurbanlarının xatirəsinin əbədiləşdirilməsi istiqamətində mühüm addımlar atılmış, bu hadisələrə dövlət səviyyəsində obyektiv hüquqi-siyasi qiymət verilmişdir.
Vurğulanmışdır ki, bu gün Azərbaycan Prezidenti İlham Əliyev tərəfindən ölkəmizin azadlığı, suverenliyi uğrunda şəhid olanların ailə üzvlərinin sosial müdafiəsini gücləndirmək və onlara dövlət qayğısını daha da artırmaq istiqamətində mühüm qərarlar qəbul edilir. Bu məqsədlə hər il dövlət səviyyəsində geniş tədbirlər planı hazırlanaraq həyata keçirilir. Şəhidlərinin xatirəsini daim uca tutan Azərbaycan xalqı bu siyasəti rəğbətlə qarşılayır və dəstəkləyir.
Bölmənin digər xəbərləri
