Bakı, 10 iyul, AZƏRTAC

Bu gün əksər şirkətlərin mühasibatlıq xidmətlərinə ehtiyacı var. Hər bir müəssisə öz məlumatlarının etibarlı şəkildə saxlanılmasını, dəqiq mühasibat uçotunun aparılmasını, o cümlədən hesabatlarının düzgün təqdim edilməsini istəyir. Şirkətin uğurundan cavabdeh olmaq və hər işin planlandığı kimi həyata keçirilməsini təmin etmək məsuliyyət, düzgünlük və dəqiqlik tələb edir. Çünki bəzi hallarda edilən səhvlər böyük maliyyə sanksiyalarına səbəb ola bilir.

“QANUN Mühasibatlıq Xidmətləri” şirkətinin təsisçisi və rəhbəri Xanoğlan Ramazanov doğru qurulmuş və optimizasiya olunmuş, şirkəti görünməyən ciddi təhdidlərdən sığortalayan mühasibatlıq prosesi barədə suallarımızı cavablandırdı.

- “İnsan dünyaya göz açandan mühasiblik də onunla başlayır” deyirlər. Sizin hekayəniz necə başlayıb?

-Əslində, tək mühasiblik yox, istənilən fəaliyyət sahəsi insanın təməlində, qanında olmalıdır. Həmin sahəyə xüsusi maraq, sevgi duyulmalıdır. Biz gənclərlə keçirdiyimiz görüşlərdə də hər zaman vurğulayırıq ki, hansı sahəni seçməyinizdən asılı olmayaraq, sevdiyiniz işlə məşğul olun ki, həm bu işdən zövq alasınız, həm də burada uğur qazana biləsiniz. Mühasiblik məsuliyyət və maraq tələb edən bir sahədir. Bu fəaliyyət növü üzrə kimisə sevgi olmadan, məcburən işlətmək və ya kiməsə işləmək mümkün deyil. Bu zaman inkişafdan və uğurdan söhbət də gedə bilməz. Mənim uşaq yaşlarımdan bu sahəyə xüsusi marağım, sevgim olub. Hansısa məhsulun istehsalına çəkilən xərc, əldə edilən qazanc və s. ilə bağlı müxtəlif hesabatlar aparmışam. Sonra tale elə gətirdi ki, sevdiyim bu işlə də məşğul oldum.

-“Qanun Mühasibatlıq Xidmətləri” şirkətini yaratmaq ideyası hansı zərurətdən yarandı?

-Artıq 15 ilə yaxındır ki, maliyyə və mühasibatlıq sahəsində fəaliyyət göstərirəm. 2020-ci ildən sonra isə müştərilərimizin sayı getdikcə artdığı üçün komanda yaratmaq zərurəti yarandı və mən “Qanun Mühasibatlıq Xidmətləri” MMC-ni yaratdım. Elə həmin vaxtdan etibarən müştərilərimizin sayı kimi əməkdaşlarımızın da sayı durmadan artır. Bu gün komanda üzvlərimizin peşəkarlığını yüksəltmək üçün mütəmadi olaraq təlimlər, kurslar təşkil edirik, bu işi sevən və bacarıqlı gəncləri ətrafımızda toplayırıq.

-Əsas fəaliyyət istiqamətləriniz hansılardır?

-Biz “Qanun Mühasibatlıq Xidmətləri” şirkəti olaraq hər növ mühasibatlıq xidmətləri, vergi uçotu, HR xidmətləri və bir qisim hüquq xidmətləri göstəririk. Bir az daha sadalasaq, fiziki və hüquqi şəxslərin onlayn qeydiyyatı, “Asan İmza” sertifikatının əldə olunması, bank hesablarının açılması, Azərbaycan Respublikası Vergi Məcəlləsinə uyğun olaraq bütün növ vergi və MDSS hesabatlarının təqdim edilməsi, kadr uçotunun aparılması, əmtəə nişanı qeydiyyatı və s. xidmətləri göstərə bilərik. Xüsusilə vurğulamaq istərdim ki, əqli mülkiyyətin 3 əsas obyektindən biri olan əmtəə nişanlarının müasir dövrümüzdə şirkətlər üçün böyük əhəmiyyəti var. Əmtəə nişanı sahibinin hüquqları pozularsa, bu həmin şirkətə böyük maddi ziyan vurulması və ya onun nüfuzdan salınması ilə nəticələnə bilər. Əmtəə nişanlarının böyük əhəmiyyətə malik olduğu belə bir vaxtda onların qorunması da hər bir şirkətin biznes strategiyasında əsas prioritetlərdən biri hesab olunur. Mən mütləq şəkildə bütün müştərilərimə tövsiyə edirəm ki, markanızın patentini alın ki, başqaları gəlib sizi qanuni şəkildə bazardan çıxara bilməsin.

-“Qanun Mühasibatlıq Xidmətləri” şirkətinin rəqiblərindən üstünlüyü nədir?

- Mən belə deyərdim ki, ümumiyyətlə, dövrün ən vacib problemlərindən biri dürüstlükdür. Mühasibatlıq məhrəm bir sahədir. Müştəri sizə bütün maliyyə hesabatlarını - mühasibatlığını, bank məlumatlarını, pulunu, Asan İmzasını etibar edir. Bu etibarı düzgün qiymətləndirmək lazımdır. Fəxr hissi ilə deyə bilərəm ki, 15 illik fəaliyyətim müddətində ən böyük qazancım müştərilərimizin etibarı olub. Bu elə bizim ən böyük fərqimizdir. Çünki dəfələrlə başqa şirkətlər tərəfindən aldadılan, etibarından sui-istifadə edilən onlarla müştəri ilə qarşılaşmışıq. Ona görə də hesab edirəm ki, bizim işimizdə əsas məqam dürüstlük və vicdandır. Müştərilərimizlə olan münasibətlərimiz də məhz bu meyarlar üzərində qurulub. Bilirik ki, iş prosesində gözlənilməz problem və ya çətinliklərlə qarşılaşmaq qaçılmazdır. Amma peşəkarlıq bu problemlərin arxasında dayanmaq, yaranmış vəziyyəti müştərinin xeyrinə dəyişə bilməkdir. Bağladığımız müqavilələrdə xüsusi olaraq qeyd olunub ki, “Qanun Mühasibatlıq Xidmətləri” şirkətinin səhvi ucbatından müştəriyə hər hansı bir zərər dəyərsə, maliyyə itkisi ilə üzləşərsə, biz, ilk növbədə, qanuni yolla bunu həll etməyə çalışırıq. Həll olunmayan məsələ olduqda isə dəymiş zərəri öz hesabımıza qarşılayırıq. Yəni, müştəri heç bir halda bizim səhvimiz ucbatından maliyyə itkisi ilə üzləşə bilməz. Biz hər zaman müştərilərimizin yanında olmağa, onları əlavə vergi risklərindən qorumağa çalışırıq.

-Mühasibatla bağlı son illərin əsas tələbi nədən ibarətdir?

-Yeniliklər çoxdur. Hər ilin sonunda Vergi Məcəlləsinə 200-dən çox dəyişiklik edilir. Mühasibat, maliyyə, vergi, kadr uçotunun müasir tələblərə uyğun aparılması ilə bağlı yeni proqram təminatları istifadəyə verilir. Onlardan istifadə etməklə müştəriyə lazım olan məlumatlar daha qısa vaxt ərzində əlçatan olur, minimum vaxt ərzində maksimum xidmət göstərmək imkanı yaranır. Ən əsası isə unutmaq olmaz ki, qanuna əməl etmək mütləqdir. Qanuna əməl etmək sizi maliyyə itkilərindən, vergi risklərindən qoruyur!

- “Hər bir biznesin uzunmüddətli uğurunun sirri qanuni mühasibatlıqdır” deyə bilərikmi?

- Bəli, qanuni mühasibatlıq hər bir biznesin əsas dirəklərindən biridir. Biznes aləminin reallıqları mühasibin daimi iştirakını tələb edir. Bu, bütün cari məsələləri effektiv və sərfəli şəkildə həll etməyə, zərurət yarandıqda isə vergi və ya mühasibatlıq sahəsində ən çətin məsələlərin həllini tapmağa imkan verir. Ən əsası isə şirkət yaradılmadan mühasibatlığa baş vurmaq, sahibkarlıq subyektləri və vergi mükəlləfiyyətlərini düzgün analiz etmək lazımdır ki, şirkət qurulduqdan sonra daha çox gəlir əldə edilsin və az vergi yükü yaransın. Bunu da “Qanun Mühasibatlıq Xidmətləri” şirkəti vasitəsilə qanuni mühasibatlıq yolu ilə həll etmək hər kəsə faydalı olar.

-Hazırda yalnız mühasibatlıqla məşğul olursunuz yoxsa başqa fəaliyyət sahələriniz də var?

-Mühasibatlıq elə bir sahədir ki, bu işi görməklə siz bütün sahələrlə yaxından tanış olursunuz. Xidmət göstərdiyimiz biznes sahələrinin özəyini gördüyümüz üçün bizə onlardan hər hansı biri ilə məşğul olmaq daha asandır. Əlavə fəaliyyət istiqamətlərimiz sırasında paxlava istehsalının incəliklərini mahir ustalardan alan və bunu ənənəvi hala gətirən “Hanoğlu Baklava & Lokum” və Şəki şəhərində yenicə açılan, eyni zamanda İsmayıllı, Qəbələ, Oğuz, Qax, Zaqatala, Balakən regionunda fermerlərin müasir suvarma sistemlərinə əlçatanlığını təmin edən “ŞƏKİ AGRO” suvarma sistemləri mağazası (SHEKİ AGRO MMC) da var. Fermerlər suvarma sistemlərinə 20 faiz ilkin ödəniş etməklə Aqrar Kredit və İnkişaf Agentliyinin tətbiq etdiyi alış məbləğinin 40%-i miqdarında dövlət subsidiyası, geri qalan 40%-i miqdarında isə faizsiz kreditdən yararlana bilərlər.

- Müştərilər niyə məhz sizi seçməlidirlər? Sizinlə uzunmüddətli əməkdaşlıq çalışdığınız şirkətlərə hansı üstünlükləri qazandırıb?

-Biz bütün şirkətlərin işlərinə öz işimiz kimi yanaşırıq. “Hanoğlu Baklava & Lokum”, “ŞƏKİ AGRO” suvarma sistemləri, “Qanun Mühasibatlıq Xidmətləri” şirkətlərinin mühasibatlıq işlərini də komandamız həyata keçirir. Yəni, öz şirkətlərimiz də bizim müştərilərimizdir. Öz şirkətlərimizə tətbiq etdiyimiz yanaşmanı çalışdığımız şirkətlərə də tətbiq edirik və ən xırda incəliklərə qədər problemləri həll etməyə çalışırıq. Bizim üçün güvən əsas yerdə dayanır. Problem varsa, həll etməyə çalışacağıq. Geri addım atmaq bizə yad olan məsələdir.

– Müsahibə üçün təşəkkür edirik.

“QANUN Mühasibatlıq Xidmətləri” şirkəti ilə əlaqə:

(055)266 69 38

(051)295 50 02

https://www.instagram.com/qanun_muhasibatliq_xidmetleri/