Xayfa universitetində 20 Yanvar faciəsinə həsr edilmiş tədbir keçirilmişdir
Bakı, 21 yanvar (AZƏRTAC). Son vaxtlar İsrail ictimaiyyətini dost Azərbaycanın müasir tarixi ilə tez-tez tanış edirlər. İsrail-Azərbaycan Beynəlxalq Assosiasiyası (Azİz) əslən Azərbaycandan olan İsrail sakinlərinin öz mənşə ölkəsinin tarixi ilə tanışlığını davam etdirərək Heydər Əliyev Fondunun dəstəyi ilə Xayfa universitetində İranın və İran körfəzi ölkələrinin öyrənilməsi üzrə “Ezra” mərkəzi ilə birlikdə 1990-cı il 20 Yanvar qanlı faciəsini anma gecəsi keçirmişdir.
Azİz Assosiasiyasından AZƏRTAC-a bildirmişlər ki, İsrailin müxtəlif guşələrində yaşayan, əslən Azərbaycandan olan sakinlər, habelə o dəhşətli Qara Yanvar gecəsində faciəli şəkildə həlak olmuş və Azərbaycan torpağında əbədi qalmış Aleksandr Marxevka, Vera Bisantina və Yan Meyeroviçin hazırda İsraildə yaşayan doğmaları və yaxınları matəm tədbirində iştirak etmək üçün Xayfa universitetinə gəlmişdilər.
Vera Bisantinanın xalası Qalina Qayduk söyləmişdir ki, onun bacısı qızı, 16 yaşlı Vera Qara Yanvar gecəsində öz evində snayper gülləsinə tuş gələrək ölümcül yaralanmış və dünyasını dəyişmişdir.
Yaralılardan birinə tibbi yardım göstərərkən güllələnmiş gənc həkim Aleksandr Marxevkanın qohumları o dəhşətli gecədə üzləşdikləri kədərdən hələ də özünə gələ bilmədiklərini söyləmişlər.
İnsanlığa zidd olan həmin qırğın zamanı öldürülmüş Yan Meyeroviçin həyat yoldaşı Valentina isə dərin kədər və təəssüf hissi ilə demişdir ki, uşaqları dinc vaxtda nə üçün atasız böyüdüklərini və nə üçün ata sevgisindən məhrum olduqlarını başa düşmürlər.
Anım tədbirində məşhur kinorejissor Andrey Konçalovskinin “Hakimiyyət yükü” adlı sənədli filmindən bir parça nümayiş etdirilmişdir. Filmin məxsusi bu tədbir üçün ivrit dilinə tərcümə edilmiş kadrları tədbir iştirakçılarını fikrən yenidən o dəhşətli Qara Yanvar gününə qaytarmışdır. O vaxt gözü yaşlı insanlarla dolu Bakı küçələrində tanklar və zirehli transportyorlar hərəkət edir, Azadlıq meydanında isə iki milyon insanın toplaşdığı dəfn mərasimi keçirilirdi. Mərasim iştirakçıları Azərbaycanın müstəqilliyi uğrunda canlarından keçmiş günahsız qurbanları son mənzilə yola salırdı.
Azərbaycan xalqının ümummilli lideri Heydər Əliyev məhz Azərbaycan üçün o dəhşətli günlərdə Azərbaycanın Moskvadakı daimi nümayəndəliyinə gələrək, sovet ordusunun Bakıda törətdiyi vəhşilikləri qətiyyətlə pisləmiş və öz ölkəsinin dinc sakinlərinə atəş açmaq barədə əmr vermiş siyasətçilərin və hərbiçilərin cəzalandırılmasını tələb etmişdi.
Xayfa universitetinin Tələbələr Evinin mərkəzi zalında Azİz Assosiasiyasının fəal üzvü, o qanlı günlərin canlı şahidi, gözü ilə gördüklərini fotoaparatının obyektivi vasitəsilə tarix üçün əbədiləşdirilmiş, hazırda İsraildə yaşayan bakılı fotoqraf Boris Dobinin çəkdiyi fotoşəkillərin sərgisi təşkil edilmişdi. Matəm tədbirinin iştirakçıları bu fotolara baxaraq o qanlı günlərdə öldürülənlərin eybəcər hala salınmış cəsədlərini, tankların əzdiyi avtobusları və təcili yardım maşınlarını, insanlığa zidd olan o qanlı qırğının qurbanlarına yas saxlayan iki milyonluq dəfn mərasiminin iştirakçılarını, habelə şiddətli gülləbarandan sonra Bakının küçə və evlərinin hansı vəziyyətə düşdüyünü görmüşlər. Fotoşəkillər Azərbaycan xalqının müstəqillik yolunda üzləşdiyi dəhşətli hadisələri gələcək nəsillərə xatırladacaq sənədlərdir.
Boris Dobin Azərbaycan tarixinin o unudulmaz günlərini əbədiləşdirmiş 67 fotoşəkildən ibarət kolleksiyasını Heydər Əliyev Fonduna vermişdir.
“Ezra” mərkəzinin direktoru doktor Soli Şahvar tədbirdə çıxış etmişdir. O demişdir ki, indi Azərbaycan beynəlxalq ictimai və siyasi həyat üçün böyük maraq doğurur. Mərkəzin elmi işçisi Emil Abramov söyləmişdir ki, mərkəz Azərbaycan tarixini öyrənməklə məşğul olur və Azərbaycan-İsrail əlaqələrinin inkişafını izləyir.
Tədbirdə Azİz Assosiasiyasının nümayəndələri Yeganə Salman, Arye Qut və Mehman Quliyev, habelə tədbirin qonaqları - “Tsairey Beyteynu” təşkilatının sədri, bir qrup fəal gənclərlə birlikdə həmin gecəyə gəlmiş Oleq Levinski və Tirat Karmel şəhər sovetinin deputatı, 24 il bundan əvvəl yanvar hadisələrinin canlı şahidi olmuş Aviran Mişiyev də çıxış etmişdir.
Bölmənin digər xəbərləri
