Xəzər rayonunda abadlıq-quruculuq işləri davam etdirilir
Bakı, 29 avqust, AZƏRTAC
Azərbaycan Respublikasının Prezidenti İlham Əliyevin göstəriş və tövsiyələrinə uyğun olaraq Xəzər rayonunda abadlıq və quruculuq işləri geniş vüsət alıb.
AZƏRTAC xəbər verir ki, rayonda mühüm tikinti-quruculuq və abadlıq işləri həyata keçirilir, irimiqyaslı infrastruktur layihələri icra olunur, yol-nəqliyyat infrastrukturu yaxşılaşdırılır, əhalinin kommunal xidmətlərlə, o cümlədən elektrik enerjisi, qaz və su ilə təchizatı, səhiyyə və təhsil müəssisələrinin tikintisi və yenidən qurulması istiqamətində mühüm tədbirlər görülür. Həmçinin rayon ərazisində insanların arzu və istəkləri nəzərə alınaraq müasir tələblərə cavab verən yeni parklar, yaşıllıq zolaqları salınır, mövcud parklar, küçə və prospektlər abadlaşdırılır.
Respublikamızın hər yerində olduğu kimi, Xəzər rayonunda da abadlıq-quruculuq işləri uğurla davam etməkdədir. Belə ki, Xəzər rayonunun Mərdəkan qəsəbəsində aparılan abadlıq quruculuq işləri çərçivəsində qəsəbənin mərkəzi Sergey Yesenin küçəsi memarlıq tələblərinə uyğun olaraq yenidən qurulur. Küçədə vətəndaşlara məxsus fərdi evlərin divarları, hasarları, darvazaları, ticarət və xidmət obyektlərinin fasadlarının təmirinə başlanılıb. Hazırda işlər sürətlə davam edir.
Aparılan abadlıq işləri çərçivəsində axşam saatlarında küçələri işıqlandırmaqla təhlükəsiz hərəkətin təşkili üçün qəsəbənin 28 May, Qılman İlkin və Zeynalabdin Tağıyev küçələrinin işıqlandırılması işlərinə başlanılıb. Bu küçələrdə elektrik xətlərinin çəkilişi işləri aparılır.
Bundan əlavə, ətraf mühitin qorunması və ekoloji vəziyyətin daha da yaxşılaşdırılması məqsədilə qəsəbə ərazisində mövcud yaşıllıqlara xüsusi diqqət göstərilir, ağac və gül kolları suvarılır, çəmənliklər biçilir, yabanı otlar təmizlənir və ətraf ərazidə təmizlik işləri aparılır.
Rayonun Binə qəsəbəsinin Qəzənfər Musabəyov, M.Ə.Sabir və Dəmiryol küçələrində də bu istiqamətdə işlər davam etdirilir. Belə ki, Q.Musabəyov küçəsindəki fərdi evlərin, hasarların və darvazaların rənglənməsi işləri aparılır, eyni zamanda, küçələrə 400 metr sahədə asfalt örtüyü salınıb. Bundan əlavə, qəsəbənin Dəmiryol və M.Ə.Sabir küçələrində isə işıqlandırma işləri həyata keçirilir.
Eyni zamanda, qəsəbənin Xəqani küçəsində də təmir işləri sürətlə davam edir. Küçədə 3 yerdə yağış sularının yığılması üçün anbar qazılıb və drenaj sistemi qurulub. Uzunluğu 1,2 kilometr olan küçədə asfaltlanma işlərinə hazırlıq gedir.
Bütün bunlarla yanaşı, qəsəbənin 2146-cı məhəllə ünvanında yerləşən iki beşmərtəbəli binada təmir işləri həyata keçirilir. 21 və 23 saylı binalarda blokların təmiri, binaların fasadlarının və dam örtüklərinin dəyişdirilməsi nəzərdə tutulub.
“Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”na əsasən, yanvar ayından etibarən Azərbaycan Avtomobil Yolları Dövlət Agentliyi tərəfindən Xəzər rayonunun Zirə qəsəbəsi, Kanala paralel olan yeni yaşayış sahəsində, dəmir yolunun yanında, Hərbi şəhərciyin arxasından Zirə qəsəbəsinə gedən yolda və Nadir Hüseynov küçəsində ümumi uzunluğu 8600 metr olan və müasir standartlara cavab verən avtomobil yolunun əsaslı təmiri və yenidən qurulması başa çatdırılıb. Hazırda əhalinin çoxsaylı müraciətlərini nəzərə alaraq, Zirə qəsəbəsinin Südçülük-tərəvəzçilik sovxozu ərazisində də uzunluğu 3000 metr olan avtomobil yolunun yenidən qurulması işləri aparılır. İndiyədək yolun 1000 metrə yaxın hissəsinin asfaltlanması başa çatdırılıb.
Hazırda Türkan qəsəbəsi, Üzümçülük sovxozu ərazisində yenidən qurulması nəzərdə tutulan və uzunluğu 1700 metr olan yolun tikintisi davam edir.
Görülən işlərin davamı olaraq Şağan qəsəbəsində də abadlıq-quruculuq işləri aparılır.
Rayonun Şağan qəsəbəsinin abadlaşdırılması, yollarının asfaltlanması və küçələrinin görünüşünün yaxşılaşdırılması istiqamətində işlər davam etdirilir. Qəsəbənin Məktəbli, N.Məmmədov, H.Xanızadə və Ş.İ.Xətai küçələrində ümumi görünüşə xələl gətirən kommunikasiya xətləri nizamlanır, bəzi hissələrdə yerüstü xətlər yerin altına salınır, işıq dirəkləri yeniləri ilə əvəz olunur, ətrafdakı hasarlarda, fərdi evlərin fasadlarında rəngləmə işləri görülür. Bu küçələrə asfalt döşənib.
Xəzər Rayon İcra Hakimiyyəti və Xəzər Rayon Gənclər və İdman İdarəsinin birgə təşkilatçılığı ilə rayonun Şüvəlan çimərliyində irimiqyaslı təmizlik aksiyası keçirilib.
Aksiyada Xəzər Rayon İcra Hakimiyyətinin əməkdaşları və gənc könüllülər, Xəzər Rayon Gənclər və İdman İdarəsinin kollektivi iştirak ediblər.
Xəzər rayon sakinləri rayonda gedən genişmiqyaslı tikinti-quruculuq və abadlıq işlərinə görə Prezident İlham Əliyevə və Birinci vitse-prezident xanım Mehriban Əliyevaya dərin minnətdarlıqlarını bildirirlər.
Bölmənin digər xəbərləri
