Bakı, 28 yanvar (AZƏRTAC). Son zamanlar dünyada Azərbaycanın turizm potensialına maraq artmışdır. Dövlət başçısı İlham Əliyev dünyada Azərbaycana marağın get-gedə artmasını, habelə bir neçə iri infrastruktur layihəsinin tamamlanmasını nəzərə alaraq 2011-ci ili ölkəmizdə “Turizm ili” elan etmişdir. Həqiqətən nadir təbii gözəlliklərə malik olan, bütün çoğrafi zonaların təmsil edildiyi Azərbaycan artıq çoxdan bəri həm dünyada turizm sənayesinin “qanunvericiləri”, həm də səyahət etməyi xoşlayan sıravi turistlər üçün cəlbedici olmuşdur.

Respublikada son illərdə turizm sahəsində həyata keçirilən uğurlu dövlət siyasəti ölkənin turizm potensialının beynəlxalq məkanda populyarlaşmasına, turistlərin Azərbaycana çoxsaylı səfərlərini təşkil etməyə imkan vermişdir. Turizmin müxtəlif növləri inkişaf etdirilmiş, bu sahədə normativ-hüquqi aktlar qəbul edilmiş, turizm sahəsində orta və kiçik sahibkarlıq inkişaf etdirilmiş, müasir turizm infrastrukturu yaradılmışdır. Ötən illər ərazində ölkəmizdə turizm sahəsində çoxsaylı beynəlxalq tədbirlər keçirilmiş, beynəlxalq turizm marşrutları işlənib hazırlanmışdır.

Qəbul edilmiş dövlət proqramlarının tələblərinə uyğun olaraq turizm sahəsində beynəlxalq standartlara cavab verən mehmanxanalar tikilmiş, aparıcı beynəlxalq investisiya şirkətləri ölkəyə cəlb edilmiş, respublikamıza gələn turistlərin sayı artmışdır. Bununla bərabər sahibkarlığın inkişaf etdirilməsi üçün müvafiq kreditlərin verilməsi, turizm obyektləri tikintisinin dəstəklənməsi, bir sıra hüquqi sənədlərin hazırlanması üzrə iş aparılmışdır.

Qeyd etmək lazımdır ki, bu dövr ərzində bəzi tarix-mədəniyyət abidələri bərpa edilmiş, onlardan turizm resursu kimi istifadə edilməsi məqsədəuyğun sayılmışdır.

Dünyanın başqa ölkələrində olduğu kimi, Azərbaycanda da sentyabrın 27-si “Dünya turizm günü” kimi qeyd edilir. Həmin gün müxtəlif mövzularda daxili turizm üzrə ümumrespublika konfransı keçirilir, turizm sahəsində mövcud problemlər müəyyən edilir, onların həlli yolları seçilir, turizm sahəsində xidmət səviyyəsinin yüksəldilməsi, turizm infrastrukturu yaradılması ilə əlaqədar məsələlər qarşıya qoyulur. Yeri gəlmişkən bu dövr ərzində turizm şirkətlərinin, turistlərə xidmət obyektlərinin iştirakı ilə daxili turizm sərgisi keçirilmişdir.

Tarixi İpək yolu üzərində yerləşən Azərbaycan özünün əlverişli coğrafi mövqeyinə görə qərbdən şərqə, şimaldan cənuba doğru keçən turizm marşrutlarında iştirak edir. Qeyd etmək lazımdır ki, ötən illər ərzində Azərbaycan ərazisində İstanbuldan başlanan və Pekində başa çatan “İpək yolu boyunca velosiped turu” layihəsinin, eləcə də Rusiyadan Hindistana qədər “XV əsr. Səyyah Afanasi Nikitinin izi ilə” adlı turizm marşrutu layihəsinin həyata keçirilməsi ölkənin turizm potensialını beynəlxalq məkanda təbliğ etmək baxımında çox səmərəli tədbirlər olmuşdur.

Azərbaycan dünyanın 28 ölkəsi ilə turizm sahəsində əməkdaşlıq etmək niyyətindədir. Artıq bu sahədə Rusiya, Avstriya, Böyük Britaniya, İsveçrə, İsveç, Macarıstan, Makedoniya, San-Marino, Malta, Xorvatiya, Argentina, Meksika, Kuba, İsrail, Yaponiya, Birləşmiş Ərəb Əmirlikləri, Səudiyyə Ərəbistanı, İran, İraq, Bəhreyn, Oman, Koreya, Bruney, İndoneziya, Malayziya, Filippin, Tunis və Çin ilə əməkdaşlıq haqqında saziş layihələri hazırlanmışdır. Bundan əlavə, 2010-cu ildə turizm sahəsində əməkdaşlıq haqqında hökumətlərarası sazişlər çərçivəsində müəyyən işlər görülmüşdür. Son 5 ildə bu sahədə Yunanıstan, Qazaxıstan, İordaniya, Fransa, Tacikistan, Misir, Litva, Mərakeş, Suriya və Latviya ilə əməkdaşlıq haqqında sazişlər imzalanmışdır. Azərbaycanın turizm imkanlarını İran körfəzi ölkələrində və Küveytdə təqdim etmək məqsədilə “Dnata” turizm şirkəti ilə Mədəniyyət və Turizm Nazirliyi arasında anlaşma memorandumunun imzalanması üzrə iş aparılır.

Azərbaycanda turizm şirkətlərinin sayını da artırmaq nəzərdə tutulur. 2001-ci ildə respublikada cəmi 30 turizm şirkəti olduğu halda, indi onların sayı 260-a çatmışdır. Bu sayda turizm firması ölkəmizin turizm xidmətləri bazarı üçün tam kifayətdir.

Azərbaycan Xəzər sahilində də turizm kompleksi inşa etmək niyyətindədir.

Ölkəmizdə turizmin inkişafı barədə planlara uyğun olaraq Azərbaycanın Şəki rayonundakı qədim məskən aparıcı turizm mərkəzlərindən birinə çevrilə bilər. Şəki rayonunun Fəzli kəndində yerləşən, “Təpəbaşı məzarlığı” adlanan bu məskən üçün turizmin inkişaf planı hazırlanır. Layihə çərçivəsində turizm-informasiya mərkəzi yaradılması, hotellər tikilməsi, mədəni turizmin təşkil edilməsi planlaşdırılır. Layihənin ümumi dəyəri 9,611 milyon dollardır. Bu məbləğin 8,1 milyon dolları kredit götürülmüş, qalan hissəsi isə sərmayədarlar tərəfindən ayrılmışdır. Bu planı 5 il müddətində həyata keçirmək nəzərdə tutulur.

Azərbaycanın Xızı rayonundakı Giləzi qəsəbəsində isə turizm şəhərciyi tikintisi planlaşdırılır. Layihənin əsas məqsədi Xızıda sahil kurort zonası yaratmaqdır. Bu layihə çərçivəsində kurort və turizm mərkəzləri tikintisi, rekreasiya zonası yaradılması nəzərdə tutulur. Şəhərciyin dəyəri 200 milyon dollara bərabərdir. Layihə Xəzər dənizi sahilində turizmin və rekreasiya zonalarının inkişaf etdirilməsi çərçivəsində planlaşdırılır.

Turistlərin rahatlığı üçün Azərbaycanda telefon informasiya sistemi yaradılmışdır. Azərbaycana gələn turist 147 nömrəsini yığaraq turizm obyektinə getmək üçün ən qısa yol barədə suallara cavab, həmin marşrutda ayrı-ayrı rayonlarda və ya istirahət yerlərində görməli obyektlərin siyahısını əldə edə bilər. Zəng vuran şəxsin seçimindən asılı olaraq ona 3 dildə - Azərbaycan, rus və ingilis dillərində məlumat verilir.

Daha bir xəbər: Azərbaycan Mədəniyyət və Turizm Nazirliyi ölkənin Qusar rayonundakı “Şahdağ” qış-yay turizm kompleksi yaradılması layihəsini 50 faiz həyata keçirmişdir. Artıq gündə 10 min turistə xidmət edə bilən infrastruktur yaradılmış, yollar salınmış, elektrik, qaz və su xətləri çəkilmişdir. Layihəni Avstriya, İsveç, Türkiyə, ABŞ, İtaliya və Birləşmiş Ərəb Əmirliklərindən olan aparıcı şirkətlər həyata keçirirlər. Ötən ilin mart ayında dağ xizəyi sürmək üçün pilot trasında sınaq yoxlamaları aparılmışdır. 2012-ci ilə qədər daha 4 xizək trasının istifadəyə verilməsi nəzərdə tutulur.

Beləliklə, yaxın gələcəkdə Azərbaycan aparıcı turizm ölkəsinə çevriləcəkdir.

Nigar Hüseynova

AZƏRTAC-ın müxbiri