Xorvatiyanın Bosniya və Herseqovina ilə sərhədində silahlı qruplar xidmət aparacaq
Sarayevo, 26 oktyabr, AZƏRTAC
Xorvatiyanın Bosniya və Herseqovina ilə sərhədində yerləşən Sinc şəhərinin meri Miro Bulj qeyri-qanuni miqrasiya ilə mübarizə məqsədilə sərhəddə silahlı qrupların xidmət aparacağını açıqlayıb.
AZƏRTAC xəbər verir ki, mer Sinc şəhərini və ətrafını qeyri-qanuni miqrantlardan qorumaq üçün könüllülərdən ibarət silahlı qrupların yaradılacağını deyib. O, mühacirlər arasında terrorçuların olduğunu da bildirib. Qeyri-qanuni miqrasiya ilə mübarizədə sərhəd təhlükəsizliyini təmin etmək üçün polis qüvvələri ilə yanaşı, ordunun da cəlb olunmasının zəruriliyini qeyd edib.
Sinc merinin bu fikirləri Xorvatiyada bir çox deputat tərəfindən tənqidlə qarşılanıb. Bu, təhlükəli və populist addım kimi qiymətləndirilib.
Cari il ərzində Xorvatiyaya gələn qeyri-qanuni mühacirlərin sayının 170 faiz, sığınacaq axtaran şəxslərin sayının isə 700 faiz artdığı bildirilir. Bu il ölkədə minədək insan alverçisi həbs olunub.
Nihad Budaqov
AZƏRTAC-ın xüsusi müxbiri
Sarayevo
Bölmənin digər xəbərləri
