Xudafərin-Qubadlı-Laçın yoluna düşən bir neçə məzarlıq və ziyarətgah köçürülüb
Bakı, 26 yanvar, AZƏRTAC
Xudafərin-Qubadlı-Laçın yolu layihələndirilən zaman bir neçə məzarlıq və ziyarətgahın köçürülməsi prosesi baş tutub.
AZƏRTAC xəbər verir ki, bu barədə yanvarın 26-da Qarabağ və Şərqi Zəngəzur bölgəsində üç mühüm avtomobil yolunun: Əhmədbəyli-Horadiz-Mincivan-Ağbənd, Xudafərin-Qubadlı-Laçın, həmçinin Laçın şəhərinə daxil olmadan yeni alternativ avtomobil yollarının tikinti layihələri üzrə tərtib olunmuş ətraf mühitə təsirin qiymətləndirilməsi sənədlərinin (ƏMTQ) müzakirəsi ilə bağlı ictimai dinləmədə məlumat verilib.
Bildirilib ki, yolun layihələndirilməsi zamanı bir çox məzarlıq tikintinin altına düşdüyündən köçürülmə prosesi olub. Müvafiq qurumların nümayəndələri ilə birlikdə, həmçinin ölən şəxslərin yaxınlarının razılığı ilə müəyyən sənədləşmə işləri aparılıb. Beləliklə, 61 məzar, XVII əsrə aid olan ziyarətgah köçürülüb. Bundan başqa, Hacı Fətəli məscidinə toxunulmayıb, yol buradan yan keçib.
Qeyd olunub ki, məzarlıqların və ümumiyyətlə, tarixi yerlərin köçürülməsi zamanı ətraf mühitin qiymətləndirilməsi prosesi çox vacibdir. Bu, inkişaf layihələrinin cəmiyyət üçün daha sürətli və ən effektiv şəkildə nəticələnməsini təmin etməyə yardımçı olur.
Bölmənin digər xəbərləri
