YANACAQDOLDURMA MƏNTƏQƏLƏRİ LEYKEMİYA XƏSTƏLİYİ YARADIR
AZƏRTAC xarici informasiya agentliklərinə istinadla xəbər verir ki, Fransa alimlərinin araşdırmalarına görə, benzin buxarı uşaqların ağır xəstəliyə - leykemiyaya tutulması ehtimalını dörd dəfə artırır.
Məlum olduğu kimi, leykemiya, yaxud qan xərçəngi xəstəliyinə tutulmuş insanlarda ağ qan cisimciklərinin yaranması prosesi pozulur. Xəstəlik orqanizmin bütün sistemlərini zədələyir və insan heydən düşüb ölür. Bu xəstəliyi yalnız ilkin mərhələlərdə müalicə etmək mümkündür və bu, orta hesabla, bir neçə min dollara başa gəlir. Lakin uşaqların, təxminən 20 faizini xilas etmək mümkün olmur.
Fransa Milli Sağlamlıq və Tibbi Tədqiqatlar İnstitutunda Jaklin Klavel və onun həmkarları leykemiyanın inkişafının mümkün səbəblərini müəyyənləşdirmək üçün araşdırmalar aparmışlar. İri şəhərlərdə yaşayan 280 uşağın müayinəsi nəticəsində onlar belə bir qənaətə gəlmişlər ki, yanacaqdoldurma stansiyalarının, ya da avtoservis emalatxanalarının yanında yaşayan uşaqların qan xərçəngi xəstəliyinə tutulması ehtimalı başqa uşaqlarla müqayisədə dörd dəfə çoxdur. Özü də belə təhlükəli qonşuluq nə qədər çox davam edirsə, onun nəticəsi də bir o qədər acınacaqlı olur: ana bətnində olduğu dövrdən etibarən həyatının hər ayında uşağın leykemiyaya tutulma ehtimalı 3 faiz artır.
“Occupational and Environmental Medicine” jurnalında dərc olunmuş məqalədə fransız alimləri güman edirlər ki, buna səbəb benzinin yanmasından əmələ gələn məhsullardır, məsələn benzoldur. Bundan əvvəl öyrənilmişdır kı, rezin, plastik maddələr və digər polimer məhsullar buraxan zavodların havasında çoxluq təşkil edən bu maddə fəhlələrdə genetik mutasiyalar, xərçəngin müxtəlif növlərini əmələ gətirir və əsəb sisteminin pozulmasına səbəb olur.
Sözsüz ki, yanacaqdoldurma stansiyası yaxınlığındakı küçədə toplanmış benzol zavod sexlərindəkindən qat–qat azdır. Buna görə də əvvəllər belə hesab edirdilər ki, o, insanın sağlamlığına ciddi ziyan vura bilməz. Tədqiqatçı Klavel topladığı məlumatları ümumiləşdirərək, yanacaqdoldurma stansiyası yaxınlığında yaşamağın nə qədər təhlükəli olduğundan dəhşətə gəlmişdir. Lakin məqalənin müəllifləri bunu da qeyd edirlər ki, avtomobillərdən çıxan qazın tərkibində insan orqanizminə təsiri hələ yaxşı öyrənilməmiş digər maddələr də var.
Klavel və onun həmkarları leykemiya ilə iri avtomobil magistrallarının yanında yaşamaq arasında əlaqənin olub-olmamasını da müəyyən edə bilməmişlər. Lakin digər tədqiqatçılar deyirlər ki, belə bir asılılıq da var. İtaliyalıların bu yaxında apardıqları araşdırmalar buna sübutdur. Milandakı Milli Xərçəng İnstitutunun əməkdaşları müəyyən etmişlər ki, işlənmiş qazın daimi təsiri leykemiyanın inkişafı ehtimalını 4-5 dəfə artırır.
Bölmənin digər xəbərləri
