Yaponiyanın Baş naziri tibbi müayinədən keçir
Tokio, 17 avqust, AZƏRTAC
Avqustun 17-də Yaponiyanın Baş Naziri Şinzo Abe Tokionun mərkəzi hissəsində yerləşən Keyo Universitetinin xəstəxanasında tibbi müayinədən keçir.
AZƏRTAC xəbər verir ki, bu barədə Kyodo agentliyi məlumat yayıb. Bildirilir ki, tibbi müayinə gün ərzində davam edəcək. Hökumət mənbələrinin agentliyə verdiyi məlumat görə, bu, plana müvafiq olaraq keçirilən müayinədir. Qeyd edilir ki, yay istirahət günlərindən istifadə edən Baş Nazir bu məqsədlə istirahət götürüb. Əlavə olaraq bildirilir ki, hökumət başçısı iyun ayında da burada müayinədən keçib.
Xatırladaq ki, avqustun əvvəllərində “Flash” yapon həftəlik nəşri iyulun 6-da Ş.Abenin kabinetində özünü pis hiss etməsi barədə məlumat yayıb. Nəşr mötəbər mənbələrə istinadla Baş nazirin qan qusması barədə xəbər verib və qeyd edilib ki, bundan sonra Ş.Abenin iş cədvəlində 5 saatlıq fasilə yaranıb.
Bundan əlavə, Baş Nazirin son vaxtlar evinə tez qayıtması, onun iştirakı ilə keçirilən mətbuat konfranslarının sayının azalması barədə məlumatlar da yayılıb.
Ş.Abenin səhhətində problemlər olması barədə yayılan şayiələri təkzib edən Nazirlər Kabinetinin baş katibi Yoşihide Suqa Baş Nazirin öz vəzifələrini tam həcmdə icra etdiyini bildirib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
