Yaqut Qarayeva: Payız-qış mövsümünə ciddi hazırlıq gedir
Bakı, 21 avqust, AZƏRTAC
Pandemiya bütün dünyada fövqəladə vəziyyət hesab olunur. Heç bir ölkə və onun səhiyyə sistemi pandemiya şəraitinə tam olaraq hazırlıqlı deyil və ola da bilməz. Bu zaman bütün tibb işçiləri ixtisaslarından asılı olmayaraq səfərbər olunurlar. Son 6-7 aydır biz bu prosesin içindəyik. Həkim-infeksionistlərin sayı kifayət qədərdir və onlar pandemiya ilə mübarizəyə ilk sırada qoşulublar. Həm paytaxtda, həm də bölgələrdə çoxsaylı təlimlər keçirilib, digər ixtisasdan olan həkimlər də bu mübarizəyə qoşulublar. Bu da bütün dünyada qəbul olunmuş bir praktikadır. Hazırda bölgələrdə təlimlər davam etdirilir.
AZƏRTAC xəbər verir ki, bunu Nazirlər Kabineti yanında Operativ Qərargahın mətbuat konfransında TƏBİB-in şöbə müdiri Yaqut Qarayeva deyib.
Onun sözlərinə görə, hazırda payız-qış mövsümünə ciddi hazırlıq gedir: "Xəstə sayı azaldığına görə, bəzi pandemiya xəstəxanaları bağlanılıb və tibb işçilərinə istirahət verilib ki, onlar qarşıdan gələn mövsümə hazırlıqlı olsunlar. Mövsümə uyğun planlar da var. Həkimlərimizə dəstək olmaları üçün başqa ölkələrdən tibbi personallar da dəvət edirik. Payız-qış mövsümünə hazırlıq məqsədilə bütün zəruri tədbirlər görülür".
Bölmənin digər xəbərləri
