Yaralansa da, döyüş meydanını tərk etməyən igid - şəhid İbarət Əkbərovun xatirəsi anılıb VİDEO
Cəlilabad, 13 oktyabr, İsmayıl Cəfərli, AZƏRTAC
Vətən müharibəsində düşməni torpaqlarımızdan qovan qəhrəmanlardan biri - İbarət Faiq oğlu Əkbərovun şəhadətinin beşinci ildönümü doğulduğu kənddə anılıb.
AZƏRTAC xəbər verir ki, İbarət 1993-cü ilin yazında Yardımlı rayonunun Mirimli kəndində dünyaya gəlmişdi. Məlikli kənd orta məktəbində oxuyub, sadəliyi, mərdliyi ilə seçilib. Ailəsi sonralar Cəlilabad rayonunun Göytəpə qəsəbəsinə köçüb və o, təhsilini buradakı tam orta məktəbdə davam etdirib. Həqiqi hərbi xidmət dövründən sonra təsərrüfat işlərində valideynlərinə dəstək olan İbarət yenidən ön xətdə xidmət etmək üçün Müdafiə Nazirliyinə müraciət ünvanlayıb. Nəhayət, 2019-cu ildən İbarət Əkbərov müddətdən artıq həqiqi hərbi xidmətə başlayıb. O, həyatının ən gözəl çağında - Vətən müharibəsi günlərində ön cəbhədə idi. BMP-1 texnikasının baş sürücü mexaniki kimi Füzuli uğrunda gedən döyüşlərdə mərdliklə vuruşub.
Şəhid anası Kəmalə Vəliyeva deyir ki, İbarət döyüşlərə qatılanda heç vaxt bu barədə yaxınlarına danışmazdı: “İbarət iki dəfə yaralanıb, mən heç bilməmişəm. Hospitalda olanda da mənə deməyib. Atası bilsə də deyib ki, mən bilməyim. İbarətin övladı yadigar qalıb. Allah bütün şəhidlərimizin yerini cənnət eləsin”.
Anım günündə kədərinə hakim ola bilməsə də, Faiq ata şəhid oğlunun yaddaşında iz qoyan bir xatirəsini qürurla xatırlayır: “Tatarıstanda işlədiyim vaxt ermənilərlə söz-söhbət düşdü. Onlardan biri “Gücünüz varsa, Qarabağda göstərin!” dedi. Bunu eşidən İbarət məndən qabaq onların cavabını verdi. O sözlər sonradan bir ömürlük anda çevrildi: “Vaxt gələr sizin cavabınızı verərik və torpaqlarımızı azad edərik”. Nə yaxşı ki, 2020-ci il sentyabrın 27-də Vətən müharibəsi başladı və mənim oğlum da müharibədə iştirak etdi. Elə bil Allah özü bu şəraiti yaratdı ki, o, verdiyi sözü yerinə yetirsin. İbarət Vətən müharibəsi dövründə düşmənlərə layiqli cavab verdi”.
İbarət sentyabrın 28-də yaralansa da geri çəkilməyib. Əksinə, döyüş meydanını tərk etmədən yoldaşlarına dayaq olub. Oktyabrın 2-də yenidən yaralanıb, hospitala gətirilsə də, beş gün sonra tam sağalmadan, könüllü şəkildə yenidən döyüşlərə qayıdıb. Oktyabrın 12-də Füzuli döyüşlərində şəhidlik zirvəsinə ucalıb.
Döyüş yoldaşı Elşən Əhədov onunla bir yerdə xidmət edib. Deyir ki, İbarət çox ürəkli uşaq idi. “Müharibə vaxtı onlar “BMP” ilə qabaqda gedirdilər. O çalışırdı ki, həmişə öz işin tez yerinə yetirsin, qabaqcıl olsun. Onun döyüşlərdəki şücaəti unudulmayacaq, daim xatırlanacaq”, - deyə Elşən bildirir.
İgid şəhidimizin qəhrəmanlığı dövlət səviyyəsində də qiymətləndirilib. Prezident İlham Əliyevin sərəncamlarına əsasən, İbarət Əkbərov ölümündən sonra “Vətən uğrunda”, “Füzulinin azad olunmasına görə”, “İgidliyə görə” medalları və “Vətənə xidmətə görə” ordeni ilə təltif edilib. Yaşadığı Göytəpə qəsəbəsində əsas küçələrdən biri onun adına əbədiləşdirilib.
Bölmənin digər xəbərləri
