Yardımlıda şəhid ailələrinə maddi yardımlar edilmişdir
Yardımlı, 21 yanvar (AZƏRTAC). Yardımlı şəhərindəki Şəhidlər xiyabanında Vətənin qəhrəman övladlarının əziz xatirəsi anılmışdır.
AZƏRTAC xəbər verir ki, rayonun rəhbər işçiləri, yaşlı nəslin və gənclərin təmsilçiləri, müharibə və əmək veteranları, ictimaiyyətin nümayəndələri “Şəhidlər” abidə-kompleksinin önünə əklillər və gül dəstələri düzərək Azərbaycanın suverenliyi və ərazi bütövlüyü uğrunda şəhid olanların xatirəsini ehtiramla yad etmişlər. Şəhidlərin ruhuna dualar oxunmuşdur.
Yardımlı Rayon İcra Hakimiyyətində isə şəhid ailələri ilə görüş keçirilmişdir.
Rayon icra hakimiyyətinin başçısı Sevindik Hətəmov 24 il əvvəl sovet ordusu tərəfindən Bakıda törədilmiş qanlı faciədən söhbət açaraq qanlı 20 Yanvar faciəsinin tariximizin həm qanlı, həm də qəhrəmanlıq səhifəsi olduğunu vurğulamış, xalqımızın azadlığı, ölkəmizin ərazi bütövlüyü uğrunda şəhid olanların ailələrinə Prezident İlham Əliyev tərəfindən daim qayğı göstərildiyini diqqətə çatdırmışdır.
Tədbirin sonunda şəhid ailələrinə və Qarabağ müharibəsi əlillərinə maddi yardımlar edilmişdir.
Bölmənin digər xəbərləri
