QAN YADDAŞI
Yaroslavldakı Azərbaycan İcması yanvar faciəsinin 24-cü ildönümünü qeyd etmişdir
Bakı, 21 yanvar (AZƏRTAC). 1990-cı il yanvarın 20-də Bakıda törədilmiş qanlı faciənin 24-cü ildönümü ilə əlaqədar Yaroslavlda matəm tədbiri keçirilmişdir. Yaroslavl vilayəti Azərbaycan Milli-Mədəni Muxtariyyəti yanında komitə rəhbəri Müşfiq Səfərəliyev mərasimdə çıxış edərək yanvar faciəsi qurbanlarının xatirəsini bir dəqiqəlik sükutla yad etməyə çağırmışdır. Sonra Azərbaycan Respublikasının Dövlət Himni səslənmişdir.
Tədbirdə vilayətin Azərbaycan Milli-Mədəni Muxtariyyəti Rəyasət Heyətinin sədri Asiman Hüseynov çıxış etmişdir. O xatırlatmışdır ki, 1990-cı il yanvarın 19-dan 20-nə keçən gecə sovet ordusu bölmələri Bakıya soxularaq, dinc əhalini vəhşicəsinə gülləbaran etmişlər. Nəticədə 147 nəfər şəhid olmuş, 744 adam yaralanmış, 841 nəfər qanunsuz həbs edilmişdir.
1994-cü ildə Milli Məclis 20 Yanvar faciəsi ilə bağlı xüsusi qərar qəbul etmişdir. Sovet totalitar maşınının törətdiyi bu qanlı qırğın sübut etdi ki, bundan sonra bir dövlət çərçivəsində yaşamaq qeyri-mümkündür. Əslində bu hadisələr SSRİ deyilən nəhəng dövlətin dağılmasını sürətləndirdi.
Mərasimdə digər iştirakçılar da çıxış etmiş, onların hamısı yekdilliklə bildirmişlər ki, azərbaycanlılar harada yaşamaqlarından asılı olmayaraq yanvar faciəsini heç vaxt unutmayacaqlar.
Sonra 20 Yanvar hadisələri haqqında qısametrajlı sənədli film nümayiş etdirilmiş, ehsan verilmişdir.
Bölmənin digər xəbərləri
