Yasamal rayonunda soyqırımı qurbanlarının xatirəsi yad edilib
Bakı, 31 mart, AZƏRTAC
Yasamal rayonundakı Heydər Əliyev Mərkəzində 31 mart - Azərbaycanlıların Soyqırımı Gününə həsr olunan tədbir keçirilib. Tədbirdə erməni daşnakları tərəfindən törədilmiş qırğının dəhşətlərindən bəhs edən sənədli film və 31 saylı tam orta məktəbin şagirdlərinin ifasında kompozisiya nümayiş olunub.
Bu barədə AZƏRTAC-a rayon icra hakimiyyətindən məlumat verilib.
Tədbir daha sonra Yasamal rayon 225 saylı orta məktəbdə davam etdirilib. Əvvəlcə soyqırımı qurbanlarının əziz xatirəsi bir dəqiqəlik sükutla yad olunub.
Yasamal Rayon İcra Hakimiyyətinin başçısı İbrahim Mehdiyev müxtəlif dövrlərdə ermənilər tərəfindən xalqımıza qarşı həyata keçirilən soyqırımı siyasətindən söz açıb. Bildirilib ki, ermənilər 1918-1920-ci illərdə Bakıda, Şamaxıda, Qubada, Muğanda, Zəngəzur qəzasında, Qarabağda, İrəvan quberniyasında və digər ərazilərdə azərbaycanlıları amansızlıqla qətlə yetiriblər. Bu qanlı qırğınların ən dəhşətlisi 1918-ci il martın 31-də və aprelin 1-2-də törədilib. Silahlı erməni əsgərləri dinc əhalini vəhşicəsinə məhv ediblər. Qırğınların davam etdiyi dövrdə Azərbaycan ərazisində 10 mindən çox, o cümlədən Bakıda və ətraf kəndlərdə 30 minə yaxın azərbaycanlı amansızlıqla qətlə yetirilib, yaşayış binaları, məscidlər və məktəblər yandırılıb.
Vurğulanıb ki, bu qanlı hadisələrə yalnız ümummilli lider Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanında hüquqi-siyasi qiymət verilib və azərbaycanlıların ermənilər tərəfindən soyqırımına məruz qaldığı ilk dəfə rəsmi olaraq bəyan edilib.
Tədbir bədii hissə ilə davam etdirilib.
Bölmənin digər xəbərləri
