Yaxın Şərqdəki bazalara hücum nəticəsində 20-dən çox ABŞ hərbçisi yaralanıb
Bakı, 25 oktyabr, AZƏRTAC
Ötən həftə ABŞ-ın İraq və Suriyadakı bazalarına pilotsuz təyyarələrin hücumu nəticəsində 20-dən çox ABŞ əsgəri yaralanıb.
AZƏRTAC xəbər verir ki, bu barədə “NBC News” telekanalı ABŞ Silahlı Qüvvələrinin Mərkəzi Komandanlığına istinadən məlumat yayıb.
Bildirilib ki, Suriyadakı Ət-Tanf bazasında 20 əsgər, İraqdakı Ayn əl-Əsəd bazasında isə daha 4 əsgər yaralanıb. Hücumlar nəticəsində hərbi obyektlərə ziyan dəyməyib.
ABŞ Müdafiə Nazirliyinin sözçüsü Patrik Rayder oktyabrın 17-dən 24-dək ABŞ və koalisiya qüvvələrinin İraqda 10, Suriyada isə 3 dəfə hücuma məruz qaldığını təsdiqləyib.
Bundan əvvəl şiə qruplaşmalarının döyüşçüləri ABŞ-dan qoşunlarını İraqdan və Yaxın Şərqin digər ölkələrindən çıxarmasını tələb ediblər. Bildirilib ki, “Amerika qoşunları dərhal bölgəni tərk etməlidir, əks halda onların bazalarına hücumlar davamlı olacaq”.
Bölmənin digər xəbərləri
