“Yeni çağırışların işığında” kitabı nəşr edilib
Bakı, 1 sentyabr (AZƏRTAC). Azərbaycan Respublikası Prezidenti Administrasiyasının xarici əlaqələr şöbəsinin analitik informasiya sektorunun müdiri, iqtisadiyyat üzrə fəlsəfə doktoru Ərəstü Həbibbəylinin müəllifi olduğu “Yeni çağırışların işığında” kitabı nəşr olunub. AZƏRTAC xəbər verir ki, 352 səhifəlik kitabda beynəlxalq münasibətlərdə, geosiyasətdə və iqtisadi inkişafda müasir baxışlar və yeni çağırışlar məsələsi Azərbaycanın dövlətçilik maraqları və dünya siyasətində gedən proseslərin fonunda təqdim olunur.
Kitabda toplanan məqalələr, icmallar və analitik yazılar “Azərbaycan reallıqları”, “Beynəlxalq münasibətlər”, “Geosiyasət”, “Sivilizasiya” və “İqtisadi əlaqələr” bölmələrində müvafiq mövzular üzrə qruplaşdırılıb.
“Azərbaycan reallıqları” bölməsində yer almış altı məqalədə multikulturalizm, mədəniyyətlərarası dialoq, yeni çağırışlar, yeni əməkdaşlıq formatı və s. kimi məsələlərdən bəhs olunur. Qeyd edilir ki, “İnkişafın Azərbaycan modeli”ni dünyaya təqdim edən ölkəmiz öz potensial imkanlarına söykənir və buna görə də Azərbaycan cəmiyyətində süni formalaşdırılmış yad modellər deyil, milli məfkurə hakimdir.
Milli ideyanın hər bir dövlətin, xalqın konkret zaman və məkan şəraitində qarşıya qoyduğu hədəflərə xidmət etməli olduğunu vurğulayan müəllif bildirir ki, Azərbaycan cəmiyyətinin bütün sahələrində bu mərhələnin öz hədəfləri və vəzifələrinin müəyyənləşdirildiyi yeni epoxa başlanıb. Dünyada mövcud şəraiti dəyərləndirib elmi təhlillərlə paralellər və müqayisələr aparan müəllif beynəlxalq təcrübədən yaradıcı şəkildə yararlanmağın zəruriliyinə nəzər yetirir, “Azərbaycan-2020: gələcəyə baxış” İnkişaf Konsepsiyasının böyük tarixi əhəmiyyətinə nəzər salır.
Beynəlxalq münasibətlər mövzusunda daha geniş söhbət açan Ə.Həbibbəyli Böyük Orta Şərq layihəsi, beynəlxalq siyasətin mühüm amili hesab olunan Rokfeller ailəsi, beynəlxalq münasibətlər sistemində arxaizm, yeni geoiqtisadi təsir aləti kimi xarici yardım, dünya media monopoliyası haqqında oxuculara dəyərli və sistemli biliklər verir. Xüsusilə kitabda Azərbaycan üçün böyük maraq kəsb edən, müasir hadisələrin fonunda Yaxın Şərqdə ermənilərin mövqeyi, ABŞ-ın Cənubi Qafqazda prioritetləri, həmçinin ermənilərin Qafqazda dominantlıq xülyası kimi məsələlərin elmi-siyasi şərhinə xüsusi nəzər yetirilir.
Əsərin “Geosiyasət” bölməsində diplomatiyanın “Məbəd düyünü”, islamofobiya, Soros Fondu, su diplomatiyası və sair barədə real faktlara əsaslanan, geniş oxucu auditoriyası üçün böyük maraq kəsb edən təhlil və icmal yazılarına da yer ayrılıb. Təqdim edilən məqalələr müasir geosiyasət haqqında sistemli bir elmi təsəvvür yaradır.
Ə.Həbibbəyli “Türk sivilizasiyasının vətəni - Böyük çöl”, “Sivilizasiya anlayışı: dəyərlər və meyarlar”, “Altay nəzəriyyəsinin gizlinləri”, “Sivilizasiyaların kəsişməsində Afrika” kimi məqalələrdə isə ulu türk dünyasına, İslam arealına tarixi, iqtisadi, beynəlxalq münasibətlər baxımından ekskurs edir. Müəllif türk sivilizasiyası və onun landşaftla əlaqəsini tədqiq edərək bu sivilizasiyanın müstəqil bir mədəni tip olduğunu və öz təbii-coğrafi landşaftı daxilində yaşaya bilməsi konsepsiyasını müvəffəqiyyətlə irəli sürür.
Kitabın “Sivilizasiya” bölməsinə daxil edilmiş yeni məqalələr müəllifin bundan əvvəl Azərbaycanda və Türkiyədə çap olunmuş “Sivilizasiyaların qovşağında Türk dünyası” adlı monoqrafiyasında qaldırılmış elmi müddəaların daha da genişləndirilməsinə xidmət edir.
Əsərin “İqtisadi əlaqələr” bölməsində Azərbaycan-Böyük Britaniya əlaqələrinin fonunda Azərbaycanda neft siyasətinin həyata keçirilməsi sahəsində əldə edilmiş mühüm nəticələrdən bəhs olunur. Ə.Həbibbəyli, həmçinin bu bölmədə qlobal iqtisadi böhranın dünyada doğurduğu gərginliklərin mahiyyətini açmağa çalışıb, Azərbaycan təcrübəsinin özünəməxsusluğunu və üstünlüklərini diqqət mərkəzinə çəkib.
Dərin elmi mülahizələrə, əhatəli analitik təhlillərə geniş yer verilən kitabda Ə.Həbibbəylinin diqqətə çatdırılan yeni dünya çağırışlarına real və dərin nəzəri-siyasi yanaşma tərzi müşahidə olunur.
Kitabda dünyanın müxtəlif coğrafi məkanlarında baş verən qlobal proseslərə dəyərli elmi baxışlar çərçivəsində nüfuz olunur ki, bunun da nəticəsində elmi və siyasi cəhətdən əsaslandırılmış sanballı analitik düşüncələr və obyektiv nəticələr meydana qoyulur.
“Yeni çağırışların işığında” əsəri beynəlxalq münasibətlər üzrə mütəxəssislər, politoloqlar, tarixçilər və iqtisadçılar, media işçiləri üçün qiymətli mənbə olduğu kimi, geniş oxucu auditoriyasının da böyük maraqla qarşılayacağı cəlbedici nəşrdir.
Bölmənin digər xəbərləri
