“Yer saatı” kampaniyası insanların diqqətini iqlim dəyişikliyinə yönəltmək üçün atılmış simvolik addımdır
Bakı, 6 mart (AZƏRTAC). “Yer saatı” (“Earth Hour”) kampaniyası martın 31-də, saat 20:30-da dünyanın hər yerində yüz milyonlarla insanı bir araya gətirəcəkdir. Bu, planetimizin qorunması yolunda diqqətin iqlim dəyişikliyinə yönəldilməsi üçün həmin insanlar tərəfindən atılmış simvolik addım olacaqdır.
“İrəli” İctimai Birliyinin mətbuat katibliyindən AZƏRTAC-a bildirmişlər ki, bununla əlaqədar təşkilatın baş katibi, “Yer saatı” kampaniyasının Azərbaycan üzrə əlaqələndiricisi Rauf Mərdiyev müraciət yaymışdır.
Müraciətdə deyilir ki, “Yer saatı” kampaniyası 2007-ci ildə Sidney şəhərində kiçik təşəbbüslə başlamışdır. Hər il martın son şənbə günü qlobal iqlim dəyişikliyinə biganə qalmayan insanlar elektrik enerjisindən istifadəni 1 saat müddətində dayandırırlar. “Yer saatı” hazırda 135 ölkədən 5 mindən artıq şəhərin dəstəklədiyi ən böyük ekoloji kampaniyadır.
Müraciətdə qeyd olunur ki, 2011-ci ildə ilk dəfə bu qlobal hərəkata qoşulan Azərbaycanın paytaxtı Bakı şəhərindəki Qız qalasının işıqları bir saat müddətində söndürülmüşdür. Kampaniyada ölkəmizin təmsil olunmasını təmin etmək bizim üçün önəmlidir. Lakin bu missiyanın uğurlu alınması üçün yalnız tələbə və gənclərin fəaliyyəti yetərli deyil. İstərdik ki, özəl şirkətlər, dövlət qurumları, ictimai təşkilatlar, fəal vətəndaşlar, bir sözlə, planetin davamlı inkişafında marağı olan hər kəs bu kampaniyada fəal iştirak etsin.
Bölmənin digər xəbərləri
