Yod istehsalı zavodu ətraf mühit üçün təhlükə törətmir
Bakı, 2 noyabr (AZƏRTAC). Ekologiya və Təbii Sərvətlər Nazirliyi Ətraf Mühitin Mühafizəsi Departamentinin əməkdaşları tərəfindən “Azəryod” MMC-yə məxsus yod istehsalı zavodunda araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, araşdırma zamanı müəssisədə yod emalı prosesində atmosferə xlorun, kükürd qazlarının, yod və sulfat turşularının reqlament normaları çərçivəsində buraxıldığı müəyyən edilmişdir. Tullantı sularından götürülmüş nümunələr üzərində aparılmış təhlillərin nəticələri göstərir ki, zərərli maddələrin miqdarı normadadır və ətraf mühit üçün hər hansı təhlükə daşımır.
Bununla yanaşı, xammal kimi istifadə olunan suyun nəqli üçün istismar olunan boru kəmərlərinin müəyyən hissələrinin korroziyaya uğradığı, tullantı sularının ətraf ərazilərə axıdıldığı məlum olmuşdur. Problemlərin aradan qaldırılması üçün müəssisəyə müvafiq icrası məcburi olan göstərişlər verilmişdir.
Hazırda bu işin icra vəziyyəti nazirliyin nəzarətindədir.
Bölmənin digər xəbərləri
