Yoluxma hallarının artım dinamikasına yol verilməməsi üçün karantin rejiminin davam etməsi zəruridir
Bakı, 29 avqust, Səadət Hakıyeva, AZƏRTAC
Mart ayının ortalarından etibarən koronavirusla əlaqədar ölkədə tətbiq olunan xüsusi sərt karantin rejiminin bitməsinə bir neçə gün qalır. Vətəndaşlar Nazirlər Kabineti yanında Operativ Qərargahın bununla bağlı qərarını səbirsizliklə gözləyirlər. Hesab edirəm ki, əgər ölkəmizdə karantin və sərtləşdirilmiş karantin rejimi tətbiq edilməsəydi, biz indi çox böyük itkilərlə, fəlakətlərlə qarşı-qarşıya qala bilərdik. Hər zaman vətəndaşının yanında olan, onun sağlamlığını, təhlükəsizliyini düşünən Prezident İlham Əliyevin çevik və uzaqgörən siyasəti nəticəsində ölkəmiz bəlanın dəhşətli fəsadlarından xilas ola bildi. Hazırda vəziyyət nəzarət altındadır. Azərbaycan yoluxanların və vəfat edənlərin sayına, habelə yoluxma və sağalma hallarının nisbətinə görə ən yaxşı nəticələr nümayiş etdirən ölkələr sırasındadır. Təsadüfi deyil ki, Ümumdünya Səhiyyə Təşkilatı da daxil olmaqla bir çox beynəlxalq təşkilatlar bunu dəfələrlə vurğulayıblar.
Bu fikirləri AZƏRTAC-a açıqlamasında Milli Məclisin deputatı Tamam Cəfərova söyləyib.
Deputat diqqətə çatdırıb ki, məhz bunların nəticəsində avqustun 5-dən sərtləşdirilmiş xüsusi karantin rejiminin yumşaldılması, məhdudiyyətlərin aradan qaldırılması mümkün olub. O bildirib: “Lakin müsbət dinamikadan qəti şəkildə arxayınlaşmamalı, məsuliyyət hissini itirməməliyik. Biz yenə də vətəndaş məsuliyyətimizlə, həmrəyliyimizlə Operativ Qərargahın qərarlarına, karantin qaydalarına birmənalı və istisnasız əməl etməliyik. Biz elə etməliyik ki, bu qərarlar davamlı olsun və uğurlu sonluqla nəticələnsin. Bununla əlaqədar, diqqət yetirilməsi tövsiyə olunan məsələlər var. Hesab edirəm ki, tibbi maska taxmaq, sosial məsafəni qorumaq kimi sadə qaydalara riayət etməklə biz bu bəladan daha tez və daha az itkilərlə xilas ola bilərik”.
T.Cəfərovanın sözlərinə görə, qarşıda duran ən mühüm vəzifələrdən biri qazanılmış uğurun qorunub saxlanması və möhkəmləndirilməsidir. Görülən işlər, çəkilən zəhmətlər sayəsində qazanılan nəticələri qorumaq hamımızın borcudur. Qətiyyən arxayınlaşmaq olmaz. “Düşünürəm ki, ölkədəki karantin rejimi koronavirusun peyvəndi tapılana qədər uzadılmalıdır. Beynəlxalq təcrübə göstərir ki, koronavirusla mübarizədə uğur qazanmış və karantin rejimini ləğv etmiş ölkələr sonrakı dövrdə infeksiyanın geniş yayılması nəticəsində yenidən məhdudiyyətləri bərpa etməyə məcbur olublar”, - deyən deputat qeyd edib ki, qarşıdan müxtəlif xəstəliklərin aktivləşdiyi payız və qış mövsümünün gəldiyini nəzərə alsaq, bu məsələ xüsusi aktuallıq kəsb edir. Son yumşalmalardan sonra yoluxanların sayının yenidən artması gündəlik xəstələnənlərin sayının sağalanlardan çox olması narahatlığa əsas verir.
“Yoluxma hallarının artım dinamikasına yol verilməməsi üçün ölkədə karantin rejimi davam etməlidir. Həmçinin rayonlara gediş-gəlişin, bir sıra qapalı məkanların, restoranların, kafelərin, iri ticarət mərkəzlərinin açılmasına, təbii ki, ciddi nəzarət etməklə icazə vermək mümkündür.
Vətəndaşlar COVID-19-un müalicəsi üçün vaksin tapılanadək mümkün qədər məsuliyyətli davranmalı, özünü və ətrafını maksimum şəkildə qorumağa davam etməlidir”, -deyə Tamam Cəfərova bildirib.
Bölmənin digər xəbərləri
