Yoluxucu heyvan xəstəliklərindən qorunmaq məqsədilə AQTA müvəqqəti məhdudiyyətlər tətbiq edib
Bakı, 7 yanvar, AZƏRTAC
Ümumdünya Heyvan Sağlamlığı Təşkilatı (OIE) Ukraynanın Xerson vilayətinin Kaxovka rayonu və Koreya Respublikasının Çunqçeonqnam-Do əyaləti ərazilərində yüksək patogen quş qripi xəstəliyi, Bolqarıstan Respublikasının Blaqoyevqrad vilayətinin ərazisində blutanq xəstəliyinin qeydə alınması barədə məlumat yayıb. Təşkilatın ötən il dekabrın 30-da və bu il yanvarın 4-də olan rəsmi məlumatları nəzərə alınaraq, Bolqarıstanın Blaqoyevqrad vilayətindən bütün növ diri iribuynuzlu və xırdabuynuzlu heyvanların və onlara aid genetik materialların, Koreya Respublikasının bütün ərazisindən və Ukraynanın Xerson vilayətindən diri quş və quş məhsullarının ölkəmizə idxalına müvəqqəti məhdudiyyətin tətbiq olunması ilə bağlı Qida Təhlükəsizliyi Agentliyi tərəfindən yanvarın 5-də müvafiq qərar qəbul edilib.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, eyni zamanda, nəzarət tədbirlərinin gücləndirilməsi məqsədilə Ukrayna, Koreya və Bolqarıstandan gələn, yaxud tranzitlə keçən nəqliyyat vasitələri ilə əlaqədar müvafiq tədbirlərin görülməsi üçün Dövlət Gömrük Komitəsinə müraciət olunub.
Bölmənin digər xəbərləri
