Yunanıstan KİV-ində ölkələrimiz arasında diplomatik əlaqələrin 30 illiyi münasibətilə məqalələr dərc edilib
Afina, 1 aprel, AZƏRTAC
Yunanıstanda geniş oxucu auditoriyasına malik “Tanea” və “Inews” onlayn xəbər portallarında ölkəmizin Yunanıstan və Albaniyada səfiri Anar Hüseynovun “Azərbaycan və Yunanıstan diplomatik münasibətlərinin 30 illiyi” sərlövhəli məqaləsi dərc edilib.
AZƏRTAC xəbər verir ki, məqalədə Azərbaycan və Yunanıstan arasında diplomatik münasibətlərin yaranması, son 30 ildə ölkələrimiz arasında ikitərəfli əlaqələrin inkişaf dinamikası haqqında geniş məlumat verilib. Məqalədə iki ölkə arasındakı siyasi dialoq, beynəlxalq və regional təşkilatlar çərçivəsində qarşılıqlı faydalı əməkdaşlıq, enerji sahəsində strateji tərəfdaşlıq, mədəniyyət, təhsil və idman sektorlarında fəal əməkdaşlığı özündə əks etdirən zəngin məqamlara xüsusi yer verilib. Hazırda ölkələr arasında gənclər sahəsində əlaqələrin yüksələn xətlə inkişaf etdiyi, həmçinin 2014-cü ildə əsası qoyulmuş Yunan-Azərbaycan Gənclər Mərkəzinin rolu xüsusi vurğulanıb. Ötən illərdə ölkələrimiz arasında 22 hökumətlərarası saziş və memorandumun imzalanması, 8-dən çox sazişin isə müzakirə ərəfəsində olması haqqında məlumat verilib.
Məqalədə Şərq-Qərb, Şimal-Cənub nəqliyyat və enerji əlaqələrinin əsas strateji qovşağında yerləşən Azərbaycanın mühüm geosiyasi əhəmiyyəti və tranzit imkanları qeyd edilib, ölkəmizin Avropa İttifaqının enerji təhlükəsizliyinə mühüm töhfə verdiyi, TAP-ın Cənub Qaz Dəhlizinin əsas komponenti kimi ayrı-ayrı ölkələrin maraqları ilə yanaşı, həm də Avropa İttifaqının qaz təchizatı mənbələrinin şaxələndirilməsi kimi ümumi strateji məqsədə xidmət etdiyi bildirilib. Ümumi büdcəsi 35 milyard dollardan çox olan bu nəhəng layihə iqtisadi artıma töhfə verməklə yanaşı, Cənubi Avropa (İtaliya, Yunanıstan) və Cənub-Şərqi Avropada (Albaniya, Xorvatiya, Bosniya-Herseqovina, Bolqarıstan) təchizat mənbələrinin diversifikasiyasını da həyata keçirir. Məqalədə Azərbaycan və Yunanıstan arasında körpüyə çevrilmiş TAP layihəsinin həyata keçirilməsinin iki ölkə arasındakı münasibətlərdə mühüm mərhələ olduğu xüsusi olaraq vurğulanıb, bu layihə sayəsində ölkələrimizin enerji sektorunda strateji tərəfdaşa çevrildiyi bildirilib. Uzun müddət fəal iqtisadi-ticarət əlaqələri iki ölkə arasında münasibətlərin mühüm əlaməti olub və ticarət dövriyyəsinin həcmi yüz milyonlarla avro təşkil edib. Maliyyə böhranı zamanı ticarət dövriyyəsinin kəskin azaldığı, lakin sonrakı illərdə yüksələn xətlə inkişaf etdiyi diqqətə çatdırılıb. 2021-ci ildə Azərbaycanla Yunanıstan arasında ticarət dövriyyəsinin 435,8 milyon dollar olduğu qeyd olunub, kənd təsərrüfatı, bərpaolunan enerji, tikinti, gəmiqayırma, təmir və turizm sahələrində əməkdaşlıq üçün əlavə imkanların araşdırıldığı barədə məlumat verilib.
Məqalədə hazırda Azərbaycan iqtisadiyyatında əsas hədəfin neft və qazdan, o cümlədən idxaldan asılılığı azaltmaq üçün iqtisadiyyatı şaxələndirmək, yeni sənaye sahələri yaratmaq, yüksək texnologiyalı məhsulları, xidmətləri və kommunikasiyaları inkişaf etdirmək, eləcə də turizmin gücləndirilməsinin prioritet olduğu qeyd edilib. Bunun üçün sənaye, turizm, bərpaolunan enerji və kənd təsərrüfatı sahələrində yunan şirkətlərinin Azərbaycanda uğurla təmsil olunacağı diqqətə çatdırılıb.
Humanitar əlaqələr baxımından Azərbaycan Dillər Universiteti tərəfindən yunan dilinin tədrisi proqramının fəaliyyətə başladığı, 1999-cu ildən Bakı Slavyan Universitetində yunan dilinin tədris olunduğu, 2004-cü ildən isə Müasir Yunan Dili Tədris və Mədəniyyət Mərkəzinin fəaliyyətə başladığı qeyd edilib. Yunanıstanın sabiq prezidenti Konstantinos Stefanopulosun Azərbaycana rəsmi səfəri zamanı Müasir Yunan Dili Tədris və Mədəniyyət Mərkəzinin açılış mərasiminin baş tutduğu haqqında da məlumat verilib. Son onilliklərdə Azərbaycan ali məktəbləri ilə Yunanıstanın bəzi universitetləri arasında Avropa İttifaqının Erasmus+ tələbə mübadilə proqramları da daxil olmaqla qarşılıqlı əlaqələrin qurulması, təhsillə yanaşı, mədəniyyət, gənclər və idman sahələrində mübadilələrin mövcud olduğu qeyd edilib.
Bildirilib ki, Azərbaycan tarixən müxtəlif mədəniyyətlərin və dinlərin ahəngdar birgəyaşayış məkanı olub və bu gün Şərqlə Qərb, xristian və müsəlman dünyası arasında etibarlı dialoq platformasıdır. Qeyd edək ki, yunan alim və incəsənət xadimləri bu prosesdə fəal iştirak edərək, hər il Bakıda keçirilən mədəniyyətlərarası dialoq forumlarında öz ölkələrini mütəmadi olaraq təmsil edirlər.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
