Yunanıstanda yay yanğınlarından sonra indi də payız daşqınları başlayıb
Afina, 11 oktyabr, AZƏRTAC
Yunanıstanda yay yanğınlarından sonra güclü yağışlar daşqınlara səbəb olub. Güclü leysan yağışı nəticəsində Evbea adasında 200-dən çox evi su basıb.
AZƏRTAC Skai telekanalının məlumatına istinadla xəbər verir ki, Evbeada bir neçə saat davam edən yağış yerli dağ çaylarının daşmasına səbəb olub. 200-dən çox evi su basıb, yolların bir hissəsi də su altında qalıb. Mantudi kəndinin bələdiyyə başçısı Yorgos Tsapurniotis Skai TV-də Agia, Anna, Akhladi və Kotsikia kəndlərindəki dramatik vəziyyət barədə danışıb. Bələdiyyə sədrinin sözlərinə görə, su axını o qədər güclü idi ki, Ahladopotamo məntəqəsində bir evi yuyub dənizə aparıb. İnsan tələfatı barədə məlumat verilmir. Evbea yaxınlığında yerləşən Pilion dağında (Mərkəzi Yunanıstan) Zagora qəsəbəsi ərazisində də güclü yağış yağıb. Meteoroloqların bildirdiyinə görə, Zagora bölgəsində hər hektar əraziyə təxminən 30 ton su yağıb və bu da evləri su basmasına və yollarda sürüşməyə səbəb olub. Şimşək orada böyük maddi ziyana səbəb olub. Yerli səlahiyyətlilərə görə, bir ev dağdan düşmüş nəhəng bir qaya parçası ilə dağılıb.
İqbal Hacıyev
AZƏRTAC-ın xüsusi müxbiri
Bölmənin digər xəbərləri
