YUNANLAR OLİMPİYA OBYEKTLƏRİNİN MÜHAFİZƏSİNƏ XÜSUSİ FİKİR VERƏCƏKLƏR

23.12.2003 [11:50]
Çap et
A⁺ A^-

AZƏRTAC-ın xarici informasiya mənbələrindən aldığı xəbərə görə, yunanlar gələn il keçiriləcək yay Olimpiya oyunlarının nəinki yüksək səviyyədə təşkilinə, həm də onların təhlükəsizliyinin təmin olunmasına indidən ciddi hazırlaşırlar. 2004-cü il oyunlarının təhlükəsizliyinə təxminən 750 milyon dollar sərf olunacaq, olimpiya obyektlərinə gediş-gəliş yarışların başlanmasına 45 gün qalmış məhdudlaşdırılacaqdır.

Təşkilat Komitəsinin bu günlərdə yayılan bəyanatında deyilir ki, məhdudiyyətlər terrorçuların hücumlarının qarşısını almaq üçün qoyulacaqdır. Odur ki, Olimpiadaya 45 gün qalmış bütün obyektlərin təhlükəsizliyi, bütün mühafizə sistemlərinin iş qabiliyyəti və xüsusi idarələrin terror aktlarının qarşısını almağa hazırlığı yoxlanılacaqdır. Olimpiadanın təhlükəsizliyinin təmin olunmasına 10 min hərbi qulluqçu, 40 min polis nəfəri, radiasiya və kimyəvi müdafiə üzrə 200 mütəxəssis cəlb ediləcəkdir. Yunanıstan hökuməti onların təlimi üçün ABŞ və İsraildən məsləhətçilər gətirmişdir.

Xatırladaq ki, Olimpiadanın açılışı 2004-cü il avqustun 13-nə nəzərdə tutulmuşdur.