Zaqatalalı kümçülər indiyədək qəbul məntəqəsinə 19 tona yaxın yaş barama təhvil veriblər
Zaqatala, 18 iyun, Mustafa Dadaşov, AZƏRTAC
Zaqatala rayonunda istehsalçılardan yaş barama tədarükü davam edir. Cari mövsümdə rayonda yaş barama istehsalının 18 tona çatdırılması qarşıya hədəf qoyulmuşdu. Kümçülər indiyədək rayonda fəaliyyət göstərən barama qəbulu və qurutma məntəqəsinə 18 ton 952 kiloqram yaş barama təhvil verərək, barama tədarükünə dair proqnoz-tapşırığa əməl ediblər.
AZƏRTAC-ın bölgə müxbiri xəbər verir ki, bu il barama yetişdirmək üçün Zaqatala rayonunda 144 kümçü ilə müqavilə bağlanılıb, onlara 450 qutu, yəni 8 kiloqram 550 qram ipəkqurdu paylanılıb. Əvvəlki illərdə olduğu kimi, bu il də kümçülərə paylanılan ipəkqurdu rayonda inkubasiya olunub.
Zaqatala Dövlət Aqrar İnkişaf Mərkəzindən verilən məlumata görə, Mazıx kəndindən İlham Bağırov cari mövsümdə qəbul məntəqəsinə rayon üzrə hamıdan çox – 410 kiloqram yaş barama təhvil verib. Lahıc kəndindən Zülfiyyə İbrahimova builki mövsümdə 388,5 kiloqram, Car kəndindən Əsədullah Mehdiyev 351,5 kiloqram, Faldarlı kəndindən Elvin Qurbanov isə 293,5 kiloqram yaş barama istehsal ediblər.
Yaş baramanın qəbulu “Azəripək” ASC-nin tədarük üzrə mütəxəssisinin iştirakı ilə həyata keçirilir.
Bölmənin digər xəbərləri
