“ZƏRİF ÜZVİ SİNTEZ VƏ KATALİZ” MÖVZUSUNDA 2-Cİ BEYNƏLXALQ ELMİ KONFRANS
Aprelin 24-də Azərbaycan Dövlət Neft Akademiyası və Milli Elmlər Akademiyası tərəfindən təşkil olunmuş “Zəriv üzvi sintez və kataliz” mövzusunda 2-ci beynəlxalq elmi konfrans öz işinə başlamışdır.
Konfrans başlanmazdan əvvəl iştirakçılar Şəhidlər xiyabanını ziyarət edərək, ölkəmizin azadlığı, müstəqilliyi və ərazi bütövlüyü uğrunda canlarından keçmiş cəsur Azərbaycan övladlarının xatirəsini andılar.
Konfransı təhsil naziri Misir Mərdanov açdı. O, Rusiya, Gürcüstan, İran, Əlcəzair, Almaniya və digər ölkələrdən gəlmiş iştirakçıları və qonaqları salamlayaraq dedi ki, bu konfransın keçirilməsi respublikamızın həyatında böyük hadisədir və Azərbaycanda sosial-siyasi sabitliyin yaradılması, elm və tədris müəssisələrinin fəaliyyətinin yüksəlməsi sayəsində mümkün olmuşdur. Bütün bunlar isə Azərbaycan Prezidenti Heydər Əliyevin məqsədyönlü daxili və xarici siyasəti nəticəsində reallığa çevrilmişdir.
Nazir vurğuladı ki, son illər alimlərimizin zərif üzvi sintez və kataliz sahəsində apardıqları tədqiqatlar iqtisadiyyatımızda mühüm rol oynayır və ona görə də konfransda dinlənəcək məruzələr, aparılacaq diskussiyalar və fikir mübadiləsi respublikada kimyanın həmin sahəsinin inkişafına kömək edəcəkdir.
Sonra Milli Elmlər Akademiyasının prezidenti Mahmud Kərimov çıxış edərək bildirdi ki, Azərbaycan Prezidenti Heydər Əliyevin ardıcıl və müdik siyasəti nəticəsində ölkəmizin suverenliyi daha da möhkəmlənmişdir. “Əsrin müqaviləsi” Azərbaycanı bütün dünyaya tanıtmışdır. Karbohidrogen xammalı ehtiyatlarının aşkara çıxıarılmasında, hasilatında və emalında alimlərimizin böyük xidmətləri var. Ölkəmizin neft konsepsiyasının əsasını onların tövsiyələri təşkil edir.
Mahmud Kərimov dedi ki, sənayenin neftayırma və neft kimyası sahələri çoxdandır Azərbaycan iqtisadiyyatında aparıcı yerlərdən birini tutur. Bazar iqtisadiyyatı şəraitində neftayırma və neft kimyası sənayesinin buraxdığı məhsulun rəqabət qabiliyyətli olması çox vacibdir. Bu isə, tədqiqatçılar qarşısında yeni-yeni vəzifələr qoyur.
Milli Məclisin elm və təhsil məsələləri daimi komissiyasının sədri Şahlar Əsgərov vurğuladı ki, kimya elminin zərif üzvi sintez kimi çox mühüm sahəsinin inkişafında ölkənin iki ali məktəbinin - ADNA-nın və BDU-nun rolu şəksizdir. Ölkəmizin bu iki məşhur ali məktəbinin rəhbərləri də BDU-nun kimya fakültəsinin məzunlarıdır. Onlar xeyli vaxtdır bu sahədə genişmiqyaslı tədqiqatlar aparırlar.
Sonra konfransın birinci ümumi iclasında ADNA-nın rektoru, Milli Elmlər Akademiyasının müxbir üzvü, professor Siyavuş Qarayev “Sililalkenlərə elektrofil birləşmənin xüsusiyyətləri” mövzusunda məruzə etdi.
Aprelin 26-dək davam edəcək konfransda müxtəlif ölkələrin alimlərinin 100-dən çox məruzəsi dinləniləcəkdir.
Bölmənin digər xəbərləri
