ZƏROŞ MİRZƏBAĞIR QIZI HƏMZƏYEVA
Zəroş Həmzəyeva 1925-ci il martın 22-də Naxçıvan Muxtar Respublikası Babək rayonunun Nehrəm kəndində anadan olmuşdur. O, səhnə fəaliyyətinə 1942-ci ildə Cəlil Məmmədquluzadə adına Naxçıvan Dövlət Musiqili Dram Teatrında başlamışdır. İfa etdiyi ilk rollara və əldə etdiyi səhnə uğurlarına görə, artıq 1944-cü ildə ona Naxçıvan Muxtar Respublikasının əməkdar artisti adı verilmişdir. Zəroş xanım 1956-cı ildə Azərbaycanın əməkdar artisti, 1967-ci ildə isə xalq artisti adlarına layiq görülmüşdür.
Zəroş xanım Həmzəyevanın yaradıcılığı Azərbaycan teatr mədəniyyəti tarixinin unudulmaz səhifələrini təşkil edir. Daim axtarışda olan sənətkar kimi o, doğma teatr səhnəsində Azərbaycan dramaturqlarının və dünya klassiklərinin əsərlərindən müxtəlif taleli obrazlara səhnə həyatı vermişdir. Görkəmli aktrisa ömrünün yarım əsrdən artıq bir dövrünü milli teatr sənətinin inkişafına həsr etmiş, mənsub olduğu qədim diyarın mədəni həyatının canlanmasında xüsusi rol oynamışdır.
Milli teatr tarixinin böyük sənətkarlar nəslinin yaradıcılıq ənənələrinə sadiq qalan Zəroş xanım Həmzəyeva səhnə həyatı boyu yüksək peşəkarlıq, müasirlərin mənəvi aləminə dərindən nüfuz edə bilmək və zamanın ruhunu gözəl əks etdirmək bacarığı nümayiş etdirmişdir. Obrazların daxili aləmini incəliklərinə qədər açmaq məharəti onun dərin təsir gücünə malik yaradıcılığının ən mühüm cəhətlərindən biri idi.
Zəroş xanım Həmzəyevanın yaradıcılığı gənc nəslin milli-mənəvi dəyərlərə bağlılıq ruhunda tərbiyə olunması baxımından böyük əhəmiyyət kəsb etmişdir. Onun milli teatrın inkişafı yolunda göstərdiyi əsl fədakarlıq, keçdiyi səmərəli və şərəfli sənət yolu aktyorlar nəslinin neçə-neçə nümayəndəsi üçün bundan sonra da vətənə, xalqa və sənətə sevgi nümunəsi olacaqdır.
Zəroş Həmzəyeva ölkəmizin ictimai-siyasi həyatında daim vətəndaşlıq mövqeyi nümayiş etdirmişdir. O, ömrü boyu qadın hüquqlarının qorunması, cəmiyyətin həyatında onların yaxından iştirakı üçün əlindən gələni əsirgəməmişdir. Zəroş xanım uzun müddət Naxçıvan Qadınlar Şurasının sədri vəzifəsində çalışmış, deputat kimi fəal iş aparmışdır.
Zəroş Həmzəyevanın milli teatr sənətinin inkişafı sahəsində göstərdiyi xidmətlər dövlət tərəfindən yüksək qiymətləndirilmişdir. O, bir çox mükafatlara layiq görülmüş, müstəqil Azərbaycan Respublikasının ali mükafatı olan “Şöhrət” ordeni ilə təltif edilmişdir.
Azərbaycan səhnəsinin tanınmış ustası, gözəl və səmimi insan Zəroş xanım Həmzəyevanın işıqlı xatirəsi onu tanıyanların qəlbində daim yaşayacaqdır.
Allah rəhmət eləsin!
İlham Əliyev, Murtuz Ələsgərov,
Artur Rasizadə, Ramiz Mehdiyev,
Vasif Talıbov, Elçin Əfəndiyev,
Hacıbala Abutalıbov, Fatma Abdullazadə,
Polad Bülbüloğlu, Zəhra Quliyeva,
Nizami Xudiyev, Anar Rzayev,
Azər Paşa Neymətov, Əliabbas Qədirov,
Hacıbaba Bağırov, Firəngiz Şərifova,
Amaliya Pənahova
Bölmənin digər xəbərləri
