ZİRVƏDƏN-ZİRVƏYƏ DOĞRU ADDIMLAYAN AZƏRBAYCAN GÜLƏŞİ
Bakı, 14 iyul (AZƏRTAC). Zamanın yaddaş kitabında Azərbaycan pəhləvanları daim öz gücü, qüvvəsi, inadkar, amma olduqca mübariz çıxışları ilə diqqəti cəlb etmiş, həmişə seçilib fərqlənmişlər.
Azərbaycan xalqının özünəməxsus döyüş ruhu, qorxmazlıq mübarizəsi güləş idman növünün forma və ənənələrində əsrlər boyu qorunaraq, bu günümüzə qədər gəlib çatmışdır. İstər keçmiş sovet dövründə, istərsə də müstəqil Azərbaycanımızda idmanın bu növünə xüsusi maraq olmuşdur. Bunun başlıca səbəblərindən biri, bəlkə də birincisi xalqımızın qorxmadan zəfər və qələbə naminə apardığı saysız-hesabsız döyüşlərdən, müharibələrdən irəli gəlmişdir.
Azərbaycan xalqının yaddaşında olan milli güləş tarixən daha qədimdir. Milli güləşin elementlərinə Qobustan qayalarında, klassik ədəbiyyatda, şifahi xalq ədəbiyyatında, o cümlədən dastanlarda daha çox rast gəlmək mümkündür.
Güləşin qədimliyini sübut edən faktlardan biri də Azərbaycanda toy və bayram şənliklərində insanların bu növdə özlərini sınamalarıdır. Azərbaycanda güləş yarışları xüsusi yerlərdə - zorxanalarda keçirilmişdir. Güclü ənənələri ilə seçilib-fərqlənən bu idman növünün aparıcı simaları vaxtilə dünyanın hər yerində tanınmışlar. Bunlara əyani misal olaraq XX əsrin əvvəllərində yaşamış pəhləvanlarımız Sali Süleyman, Rəşid və Cümşüd Yusifov qardaşlarını göstərmək olar.
Milli güləşin inkişaf etməsi və gənclərin sevimli məşğələsinə çevrilməsi bir tərəfdən milli irsimiz və ənənələrimizlə bağlıdırsa, digər tərəfdən, sonradan meydana gəlmiş peşəkar güləş məktəbi ilə əlaqədardır.
Güləş Azərbaycanda hər zaman insanların diqqət mərkəzində olan idman növüdür. Bu idman növü ilə məşğul olan idmançılarımızın uğurları getdikcə daha da artır. Təsadüfi deyildir ki, müstəqilliyimizin bərpasından sonra beynəlxalq miqyasda qazandığımız ilk medallar da güləşçilərimizin adı ilə bağlıdır.
Azərbaycan güləşinin bir idman növü kimi təşəkkül taparaq inkişaf etməsində misilsiz xidmətləri olan ümummilli lider Heydər Əliyev gənclərin fiziki sağlamlığı naminə bütün qüvvələri səfərbər edərək, qədim tarixi kökləri olan bu idman növünə böyük maraq yaratmışdır. Bu gün isə ölkə başçısı İlham Əliyev tərəfindən davam etdirilən idman siyasətinin, idmana və idmançılara göstərilən diqqət və qayğının nəticəsidir ki, Azərbaycanda güləş məktəbi gündən-günə inkişaf edir, güləşçilərimiz yeni-yeni zirvələr fəth edir, bu yolda inamla irəliləyirlər.
Pəhləvanlarımızın 2009-cu ilin Avropa çempionatında 5 qızıl, 2 gümüş və 2 bürünc, dünya çempionatında 3 qızıl, 4 gümüş və 3 bürünc, 2010-cu il Avropa çempionatında isə 7 qızıl, 2 gümüş və 1 bürünc medal qazanmaları buna əyani sübutdur.
Avropa çempionatında medal qazanmış idmançılarımızla görüşən Prezident İlham Əliyev demişdir: “Güləş Azərbaycanda həmişə idmanın ən populyar, ən birinci növlərinin sırasındadır. Azərbaycanda güləşin böyük tarixi, böyük ənənələri vardır. Bu gün güləşçilərimiz Azərbaycanın idman şöhrətini yüksəklərdə saxlayırlar… Son illər ərzində Güləş Federasiyasında doğrudan da ciddi dönüş yaranıb. Çox gözəl ab-hava vardır. Bilirəm ki, idmançılarla federasiya əməkdaşları arasında, məşqçilər arasında çox gözəl münasibətlər vardır. Bu, məni çox sevindirir və hesab edirəm ki, hər bir sahədə işlər düzgün təşkil olunanda nəticələr də yüksək olur. Bu qələbələr, ilk növbədə, idmançıların qələbələridir, onların uğurudur. Ancaq əlbəttə ki, məşqçilər, idman mütəxəssisləri, federasiya rəhbərliyi bu qələbəyə öz töhfəsini vermişdir. Bizdə idmanla məşğul olmaq üçün bütün imkanlar, bütün şərait vardır və bu gün idmanın güləş növü bunu bir daha sübut etdi. Biz güclülərin sırasındayıq, biz bu zirvəyə qalxmışıq. Zirvəyə qalxmaq çox çətin və şərəfli işdir. Ancaq zirvədə qalmaq ondan da çətindir və sadəcə olaraq, son 2-3 ilin tarixi onu göstərir ki, biz bu zirvədə öz yerimizi möhkəmləndirmişik”.
Prezident İlham Əliyevin vurğuladığı kimi, Azərbaycan güləşçiləri bu gün də zirvəyə doğru inam və əzmlə irəliləyirlər. Təsadüfi deyildir ki, FİLA-nın və onun təşkilat komitəsinin, Avropa Güləş Federasiyasının, digər beynəlxalq idman təşkilatlarının rəhbərləri əminliklə deyirlər: həm inkişafına, həm də idman sahəsindəki təşkilatçılığına, müasir qurğularına, həmçinin idmançılarına görə Azərbaycan ən yüksək, dünya miqyaslı idman tədbirlərinə və ən vacibi isə Olimpiya oyunlarına ev sahibliyi etmək iqtidarındadır.
Bütün bu həqiqət dolu sözlərin kökündə son illər Azərbaycanın bütün bölgələrində müasir standartlara cavab verən Olimpiya-idman komplekslərinin inşa edilməsi durur. Müasir standartlara cavab verən bu komplekslər ən vacib idman qurğuları ilə təchiz edilmiş və idmançılar üçün hər cür şərait yaradılmışdır.
Ən maraqlı məqamlardan biri isə mötəbər beynəlxalq yarışlara ev sahibliyi edən Bakının bu günlərdə daha bir möhtəşəm yarışa hazırlaşmasıdır. Belə ki, iyulun 16-dan 18-dək Bakıda güləş üzrə ulu öndər Heydər Əliyevin xatirəsinə həsr olunmuş “Qızıl qran-pri” beynəlxalq turnirinin final mərhələsi keçiriləcəkdir. Son illər ənənəvi olaraq keçirilən bu möhtəşəm yarışa cari ildə dünyanın 30-dan çox ölkəsini təmsil edən pəhləvanlar qatılacaqlar. Yenə də idmançılarımızın qarşısında zirvəyə doğru inamla addımlayıb birincilik qazanmaq ən ali məqsəd kimi qoyulmuşdur.
Bütün yarışlarda bacarıq və hazırlığı ilə qələbələrə imza atan Azərbaycan güləşçiləri 2012-ci ildə Londonda keçiriləcək Olimpiya oyunlarında ölkəmizin şərəfini ləyaqətlə qoruyacaqlar. Biz buna inanırıq və bu yolda hər bir güləşçimizə uğurlar arzulayırıq.
Samirə Allahverdiyeva
AZƏRTAC-ın müxbiri
Bölmənin digər xəbərləri
