Xaçmaz, 1may, Elxan Yusifli, AZƏRTAC

Mayın 1-də Xaçmazda gömrük xidməti ilə biznes subyektlərinin nümayəndələrinin təmsil olunduğu İctimai Şurada qeyri-neft məhsullarının istehsalının və ixrac potensialının artırılması məsələləri müzakirə edilib.

AZƏRTAC xəbər verir ki, Quba-Xaçmaz iqtisadi zonasına daxil olan rayonlarda fəaliyyət göstərən sahibkarlarla görüşdə Dövlət Gömrük Komitəsinin Xaçmaz Gömrük İdarəsinin rəhbər şəxsləri, Kənd Təsərrüfatı Nazirliyi yanında Dövlət Fitosanitar Nəzarəti və Dövlət Baytarlıq Nəzarəti xidmətlərinin ərazi üzrə nümayəndələri də iştirak ediblər.

Xaçmaz Tarix-Diyarşünaslıq Muzeyində keçirilən görüşdə gömrük orqanları tərəfindən xarici ticarətin asanlaşdırılması və daxili bazarın qorunması istiqamətində görülən işlər, gömrük ödənişləri zamanı sahibkarlara tətbiq olunan güzəştlər, göstərilən elektron gömrük xidmətləri haqqında məlumat verilib.

Xaçmaz Gömrük İdarəsinin rəis müavini Vüsal Əzizov ölkədə qeyri-neft sektorunun inkişafına göstərilən dövlət dəstəyinin bu sahənin sürətli inkişafına təkan verdiyini diqqətə çatdırıb. Bildirib ki, Prezident İlham Əliyevin yürütdüyü davamlı inkişaf strategiyasına uyğun olaraq sahibkarlıq subyektlərinin inkişafı üçün lazımi şərait yaradılıb və sahibkarlar hərtərəfli şəkildə dövlət qayğısı ilə əhatə olunub. Ölkə iqtisadiyyatının davamlı inkişafında bölgə sahibkarlarının da öz töhfələrini əsirgəmədiklərini söyləyən V.Əzizov gömrük orqanları ilə sahibkarlar arasında mütəmadi keçirilən görüşlərin ümumi işə faydasından da bəhs edib.

V.Əzizov bildirib ki, 2016-cı ildə Xaçmaz Gömrük İdarəsinin ümumi mal dövriyyəsi 278 milyon 495 dollar təşkil edib. Ötən il ərzində idarə tərəfindən 477 min ton yük rəmiləşdirilib. Əsas ixrac olunan məhsullar kartof, pomidor və digər kənd təsərrüfatı mallarıdır.

Çıxışlarda Dövlət Gömrük Komitəsi tərəfindən son illərdə biznes və investisiya mühitinin davamlı olaraq yaxşılaşdırılması, bu sahədə qanunvericilik bazasının təkmilləşdirilməsi, inzibati prosedurların sadələşdirilməsi, biznes subyektlərinə dəstəyin genişləndirilməsi ilə bağlı görülmüş işlərdən söz açılıb, gömrük sistemində qanunvericiliyin təkmilləşdirilməsinin, “bir pəncərə” prinsipinin tətbiqinin, elektron xidmətlərin rəsmiləşdirməni asanlaşdırmaqla yanaşı, həm də onu sürətləndirdiyi diqqətə çatdırılıb.

Xaçmaz Gömrük İdarəsinin rəisi Azər Məmmədov iş adamlarının fikirlərini, onları düşündürən məsələləri və yeni təklifləri öyrənməyin vacib olduğunu vurğulayıb. Bildirilib ki, ölkədə sahibkarlıq sahəsində işgüzar mühitin yaranmasında bütün dövlət orqanlarının, o cümlədən gömrük orqanlarının qarşısında konkret vəzifələr dayanır. Gömrük orqanlarının əsas vəzifələrindən biri məhz sahibkarlıq işinə dəstək vermək və yeni üsullar tətbiq etməkdir. Burada biznes subyektlərini maraqlandıran bəzi məsələlər, o cümlədən idxal-ixrac əməliyyatları, gömrük rəsmiləşdirmələri, gömrük nəzarəti məsələləri ilə bağlı, ümumiyyətlə, yüklərin yoxlamalardan keçirilməsi, vergi və rüsumların toplanması və digər məsələlər müzakirə olunur.

Görüşdə Kənd Təsərrüfatı Nazirliyi yanında Dövlət Fitosanitar Nəzarəti və Dövlət Baytarlıq Nəzarəti xidmətlərinin ərazi üzrə nümayəndələri də çıxış edərək gömrük orqanları ilə qarışlıqlı əməkdaşlıq və bu sahədə görülən işlərdən danışıblar.

Tədbirdə bir sıra təkliflərlə çıxış edən iş adamları sahibkarlıq subyektlərinin dəstəklənməsi məqsədilə dövlət qurumları tərəfindən görülən işlərə, həmçinin iş adamlarının fəaliyyətinin düzgün istiqamətləndirilməsi ilə bağlı bu cür görüşlərin keçirilməsinə görə minnətdarlıqlarını bildiriblər.