Bavariyanın biznes dairələri azərbaycanlı iş adamları ilə əməkdaşlıqda maraqlıdır VİDEO
Bakı, 31 may, AZƏRTAC
Bavariyanın biznes dairələri azərbaycanlı iş adamları ilə əməkdaşlıqda maraqlıdır.
AZƏRTAC xəbər verir ki, bu fikir Alman-Azərbaycan Xarici Ticarət Palatasının təşkilatçılığı ilə mayın 31-də Bakıda keçirilən Bavariya-Azərbaycan biznes forumunda səsləndirilib.
Tədbir Bavariyanın İqtisadiyyat, Media, Energetika və Texnologiyalar Nazirliyinin dövlət katibi Frans Yozef Pşirerin rəhbərliyi ilə bu torpaqdan olan müəssisələrin nümayəndə heyətinin ölkəmizə səfəri çərçivəsində baş tutub. Forumda tikinti, inşaat, şəhərsalma, maşınqayırma və avadanlıq, avtomobil sənayesi, informasiya və kommunikasiya texnologiyaları, ətraf mühit texnologiyaları, peşə təhsili, tibbi xidmət, istehlak malları, turizm sahələrini təmsil edən 120-dən çox Bavariya və Azərbaycan biznes nümayəndələri iştirak edib.
Alman-Azərbaycan Xarici Ticarət Palatasının icraçı direktoru Tobias Baumann təmsil etdiyi qurum haqqında məlumat verərək deyib ki, Bavariya və Azərbaycan arasında dostluq münasibətləri qurulub və mütəmadi görüşlər keçirilir. Bavariyanın biznes dairələri azərbaycanlı iş adamları ilə əməkdaşlıqda maraqlıdırlar.
2016-cı ilin yekunlarına görə, Bavariya ilə Azərbaycan arasında ticarət dövriyyəsinin təxminən 1 milyard avroya yaxın olduğunu bildirən dövlət katibi Frans Yozef Pşirer qeyd edib ki, Bavariya və Azərbaycan arasında ticarət dövriyyəsinin daha da artırılması üçün potensial və birgə əməkdaşlıq üçün imkanlar mövcuddur. “Bavariya Almaniya Federativ Respublikasının ayrılmaz hissəsidir və biz dünyada ən rəqabətqabiliyyətli iqtisadiyyata malikik. Bizim öz ixrac siyasətimiz var. Ötən il ixracımız 185 milyard avro təşkil edib”, - deyə dövlət katibi diqqətə çatdırıb.
Almaniya Federativ Respublikasının Azərbaycandakı səfiri Mixael Kindsqrab ölkələrimiz arasında mövcud əlaqələrdən danışıb, Bavariyanın Azərbaycanla iqtisadi əlaqələrini genişləndirməkdə maraqlı olduğunu deyib.
Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov ölkəmizin biznes və investisiya imkanları, sənaye parkları barədə məlumat verib. Hazırda ölkəmizdə 200 alman şirkətinin fəaliyyət göstərdiyini deyən AZPROMO rəhbəri qeyd edib ki, Azərbaycan Almaniya ilə bir sıra sahələrdə əməkdaşlığın inkişafına maraq göstərir.
Tədbirdə Knauf Marketinq MMC-nin baş direktoru Samir Quliyev, Schaeffler AG şirkətinin baş vitse-prezidenti Yaşar Musayev və Bavariya şirkətləri təqdimatlarla çıxış ediblər.
Biznes-forum iş adamları arasında əlaqələrin genişləndirilməsi və yeni əməkdaşlıq istiqamətlərinin müzakirə olunduğu ikitərəfli görüşlərlə davam etdirilib.
Bölmənin digər xəbərləri
