Taekvandoçularımızın uğurlarının sayı ildən-ilə daha da artır VİDEO
Bakı, 5 sentyabr, AZƏRTAC
Sentyabrın 5-də Gənclər və İdman Nazirliyində (GİN) taekvando üzrə milli komandamızın dünya çempionatında, eləcə də idmançılarımızın tələbələrin XXIX Yay Universiadasında qazandıqları uğurlu nəticələrlə bağlı mətbuat konfransı keçirilib.
AZƏRTAC xəbər verir ki, GİN-nin idman şöbəsinin müdiri Fərid Mansurov idmançılarımızı uğurlu nəticələr münasibətilə təbrik edib. O, idmançılarımızın bundan sonra da beynəlxalq yarışlarda uğurla çıxış edəcəklərinə əmliyini bildirib.
Azərbaycan Taekvando Federasiyasının vitse-prezidenti Nağı Səfərov idmanın bu növünün ölkəmizdə ildən-ilə sürətlə inkişaf etdiyini, yüksək nəticələr qazanıldığını bildirib: “Taekvandoçularımız dünya çempionatında 2, Universiadada 5 medal qazanıblar. Lakin millimiz daha yaxşı nəticə göstərmək iqtidarındadır və medallarımızın sayı çox ola bilərdi. Ancaq dünya çempionatında 1 qızıl və 1 gümüş medal da böyük nəticədir. Sevindirici haldır ki, mundialda mükafatlarımızın sayı artan templə davam edir. Komandamızı qarşıda Qran-pri turniri gözləyir”.
Tələbələrin XXIX Yay Universiadasında Azərbaycan nümayəndə heyətinin rəhbəri, Gənclər və İdman Nazirliyinin sektor müdiri Aydın Məmmədov yığma komandamızın yüksək səviyyədə çıxış etdiyini vurğulayaraq deyib: “Universiadaya 19 idmançı ilə qatılmışdıq. Komandamız 3 qızıl, 1 gümüş, 4 bürünc medalla 24-cü yerdə qərarlaşdı. Universiadada 134 ölkənin idmançıları 21 idman növü üzrə mübarizə aparırdılar. Orada bir çox görüşlər də keçirdik. Görüşlərdə idmançılar və rəsmilər Azərbaycanda keçirilən mötəbər idman yarışlarının peşəkarlıqla təşkil edildiyini xüsusi vurğulayırdılar”.
Kişi taekvandoçulardan ibarət yığma komandanın böyük məşqçisi Rəşad Əhmədov da idmançılarımızın əldə etdiyi nəticələrin uğurlu olduğunu, yığma komandamızın növbəti yarışlarda daha çox medal qazanacağına inandığını qeyd edib.
Universiadada cüdo üzrə milli komandamızın baş məşqçisi Azər Şıxəlizadə yarışlara qatılan üç idmançıdan ikisinin medal qazanmasının yüksək nəticə olduğunu bildirib: “Biz istəyirdik ki, hər üç idmançımız medal qazansın. Lakin bir qızıl və bir bürünc medallara sahib olduq”.
Tələbələrin XXIX Yay Universiadasında yüngül atletika üzrə qızıl medal qazanan Nazim Babayev bu ilin onun üçün uğurlu olduğunu deyib: “Mən IV İslam Həmrəyliyi Oyunları, Avropa çempionatı və tələbələrin XXIX Yay Universiadasında qızıl medal qazandım. Ona görə də bu ilin mənim üçün uğurlu olduğunu deyə bilərəm. Universiadada finaldan bir gün əvvəl zədələnmişdim. Taekvando üzrə milli komandamızın həkimi zədəmi müalicə etdi və final qarşılaşmasında qızıl medal qazana bildim”.
Sonda jurnalistlərin sualları cavablandırılıb.
Bölmənin digər xəbərləri
