Doqquz ayda Şəmkirdə 3500-dən çox yeni iş yeri açılıb VİDEO
Şəmkir, 18 oktyabr, Famil Quliyev, AZƏRTAC
Bu ilin doqquz ayında Şəmkir rayonunda abadlıq-quruculuq işləri uğurla davam etdirilib. Avqust ayında Prezident İlham Əliyevin rayona tarixi səfəri zamanı bir sıra sosial obyektlərin açılışı gerçəkləşib. Rayonda “Azərxalça” ASC-nin Şəmkir filialının, Şəmkir Dağ Cəyir avtomobil yolunun, “Azərişıq” ASC-nin Şəmkir İdarəetmə Mərkəzinin, “Aqropark” Logistika Mərkəzinin açılışı olub.
AZƏRTAC xəbər verir ki, bu sözləri Şəmkir rayonunun ötən doqquz ayda sosial-iqtisadi inkişafının yekunları və qarşıda duran vəzifələrə həsr olunan hesabat yığıncağında icra hakimiyyətinin başçısı Alimpaşa Məmmədov deyib.
Hesabat məruzəsində diqqətə çatdırılıb ki, 2014-cü ilin son rübündən etibarən kənd təsərrüfatı məhsullarının istehsalını, tədarükünü, emalını və realizasiyasını təmin etmək məqsədi ilə Şəmkir rayonunda fəaliyyət göstərən 42 bələdiyyənin nəzdində respublikada ilk dəfə olaraq 45 məhdud məsuliyyətli cəmiyyət təsis edilib, bir sıra sosial layihələrin, o cümlədən kənd təsərrüfatı üzrə pilot layihələrin icrasına başlanılıb.
Bildirilib ki, cari ildə 8304 hektar sahədə buğda, 5777 hektar sahədə arpa əkilib. Buğda sahələrindən 26822 ton, arpa sahələrindən isə 16233 ton məhsul yığılıb, 6489 hektar kartof sahəsindən 112808 ton məhsul götürülüb. Məhsuldarlıq əvvəlki illə müqayisədə nəzərəçarpacaq dərəcədə artıb. Həmçinin 1203 hektar sahədə şəkər çuğunduru əkilib. Barama istehsalı 2016-cı ildə 2891 kiloqram olduğu halda, bu il 5054 kiloqram məhsul əldə edilib.
Qeyd olunub ki, son doqquz ayda rayonda 3611 yeni iş yeri yaradılıb. Onun da 1122-si daimidir.
Yığıncaqda rayonun kənd və qəsəbələrində məktəb, uşaq bağçası və xəstəxanaların təmir və tikintisinin davam etdirildiyi də diqqətə çatdırılıb.
Vurğulanıb ki, əhalinin elektrik enerjisinə olan tələbatının ödənilməsi istiqamətində bir sıra işlər görülüb. Belə ki, Şəmkir şəhəri, Kür qəsəbəsi, Dəllər Cəyir və Dəllər-Daşbulaq kəndlərindən sonra Çaparlı kəndinin də elektrik təsərrüfatı yenidən qurularaq müxtəlif diametrli SİP kabellər çəkilib, abonentlər smart sayğaclarla təmin olunublar.
Şura yığıncağında xidməti təşkilatların hesabatları dinlənilib, qarşıda duran məsələlər və problemlərin həlli yolları müzakirə edilib.
Bölmənin digər xəbərləri
