Bakı, 7 sentyabr, AZƏRTAC

Sentyabrın 7-də Ekologiya və Təbii Sərvətlər Nazirliyində ov mövsümü və Azərbaycanda ovçuluğun təşkilinə həsr olunmuş mətbuat konfransı keçirilib.

AZƏRTAC xəbər verir ki, nazirliyin mətbuat xidmətinin rəhbəri İradə İbrahimova ovçuluqla bağlı nazirliyin “Qaynar xətt”inə çoxsaylı müraciətlərin daxil olduğunu deyib.

Nazirliyin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin direktoru Hikmət Əlizadə bildirib ki, mayın sonundan ov mövsümü açıq elan edilib. Ov mövsümü elan edilərkən heyvanların quşların bioloji xüsusiyyətləri, yayılması, çoxalması, artması dövrü nəzərə alınır. İlk olaraq Dağıstan turunun ovlanmasına icazə verilib və avqustun sonunadək davam edib. Avqustun 24-dən etibarən isə göyərçinkimilərin, bildirçinin ovuna başlanılıb. Sentyabr ayından ilin sonunadək çöl donuzları və dovşanların ovlanmasına da icazə veriləcək. Oktyabrın ortalarında su-bataqlıq quşların ovuna başlanacaq. Ov mövsümü fevralın sonu, martın əvvəlində bağlanacaq. Yerli və xarici ovçular ən çox quş ovuna maraq göstərirlər.

“Ovçuların sayı hər il artır. Bəzən ov icazələrinin sayının artırılması tələb edilir. Lakin bu icazələrin sayı, ovçuların sayına və istəyinə uyğun müəyyən edilmir. Bu, ovlanan fauna növünün sayından asılıdır və elmi araşdırmaların nəticəsinə uyğun müəyyən edilir. Azərbaycan vətəndaşları ov icazələrini nazirliyin yerli qurumlarından və ərazi ekologiya şöbələrindən ala bilərlər. Xarici vətəndaşlar isə müvafiq şirkətlərin vasitəçiliyi ilə departamentə müraciət etməlidirlər. Vasitəçilik funksiyasını yerinə yetirən şirkətlər isə xarici vətəndaşların Azərbaycan qanunlarına riayət edəcəyi barəsində öz üzərlərinə müəyyən öhdəliklər götürməlidirlər. Xarici vətəndaş qanunu pozduğu halda 2000 manata qədər cərimələnir, onun ölkədən çıxarılması üçün müraciət edilir və şirkətlə işləməyə məhdudiyyət qoyulur. Ümumilikdə, mövsüm başlayandan 10 şirkət xarici vətəndaşlar üçün ovun təşkilinə görə müraciət edib və onların hamısına müsbət cavab verilib:”, - deyə departament direktoru qeyd edib.

O, deyib: “Hazırda nazirliyin respublikanın müxtəlif bölgələrində 10 ovçuluq təsərrüfatı var. Lakin onların maddi-texniki təchizatı, ovçulara göstərdiyi xidməti bizi çox da qane etmir. Buna görə də nəzərdə tutmuşuq ki, yaxın gələcəkdə həmin təsərrüfatlar bu sahədə böyük təcrübəsi olan şirkətlərin istifadəsinə verilsin. Ovçuluq təsərrüfatları ovun təşkilində təcrübəsi olan şirkətlərin istifadəsinə verilə bilər. Əsas məqsədimiz Azərbaycanda sivil qaydada ovun təşkilinə nail olmaq, ətraf mühitə ziyan vurulmasının qarşısını almaqdır. Ov mövsümü başlayandan hələ ki, qanun pozuntularına rast gəlinməyib”.

Departament direktoru xüsusi mühafizə olunan təbiət ərazilərində, yaşayış məntəqələrinin, təsərrüfat sahələrinin yaxınlığında, parklarda ov edilməsinin qadağan olunduğunu da diqqətə çatdırıb.