CƏMİYYƏT
Əziz Qaralov : Badamdar-20-ci sahə avtomobil yolunun sağ kənarındakı sürüşmə zonasında çatlar böyüyür VİDEO
Bakı, 19 oktyabr, AZƏRTAC
Badamdar-20-ci sahə avtomobil yolunun sağ kənarındakı sürüşmə zonasında çatlar böyüyür və yaşayış sahələrinə yaxınlaşır. Eyni zamanda, sürüşmə kütlərinin qərb hissəsində yaranmış çatlarda nisbi də olsa artım müşahidə edilir. Yəni sürüşmə kütləsi üzərində gərginlik qalmaqdadır.
AZƏRTAC xəbər verir ki, bu sözləri Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov sürüşmə zonasında keçirilən brifinqdə deyib.
Onun sözlərinə görə, hazırda ölkədəki sürüşmə zonalarında aktivlik müşahidə olunur. Zığ qəsəbəsi, Masazırdakı “Zəli gölü” adlanan ərazidə, Abşeron rayonunun “At yalı” adlanan yaşayış massivindəki sürüşmə sahəsində aktivlik müşahidə olunur. Bu aktivlik Şamaxı, İsmayıllı rayonlarındakı sürüşmə sahələrində də var. Belə ki, Şamaxının Muğanlı kəndində, İsmayıllı yolunda və Bakı-Şamaxı-Yevlax yolunun 132-ci kilometrliyində gərginlik qeydə alınıb. Burada müəyyən yerlərdə uçqun tipli sürüşmələr baş verib. Bundan əlavə, İsmayıllı rayonunun Lahıc inzibati ərazi vahidliyinə daxil olan Qoydan kəndində iki ay öncə sürüşmə olub. Proses hazırda aktiv fazadadır və yaşayış evlərinin divarlarına çatıb. Bundan əlavə Astarada, Lerikdə, Yardımlıda, Lənkəran-Lerik yolunun bir neçə kilometrliyində uçqun tipli çökmə-sürüşmə hadisəsi baş verib.
“Zığ şosesindəki çökmə tipli sürüşmə tektonik xətt üzrə yerləşən ərazidə qeydə alınıb. Həmin ərazidə bir metrdən çox çökmə, divarların aralanması və evlərin əksəriyyətində deformasiyalar müşahidə olunur. Orada layların yatımı qərb istiqamətindədir. Lakin yamac şərq tərəfə maili olduğu üçün sürüşmə və uçqunlar həmin istiqamətdə daha çox baş verir. Oktyabrın 18-də baş vermiş sürüşmə hadisəsi nəticəsində yolun bir hissəsində metal konstruksiya ilə inşa edilmiş istinad divarı uçub, ona bərkidilmiş divarların əksəriyyəti isə çatlayıb. Yenidən həmin istinad divarı inşa olunur. Təmir işləri zamanı beton kütləsinin ana süxur üzərində yerləşdirilməsi tövsiyə olunur. Prosesin qarşısı alına bilər. Ərazidə səkilər də deformasiya olub və gərginlik müəyyən qədər qalmaqdadır”, - deyə ekspedisiya rəisi qeyd edib.
Azərbaycan Milli Elmlər Akademiyasının nəzdində Respublika Seysmoloji Xidmət Mərkəzinin baş direktoru Qurban Yetirmişli paytaxtın Səbail rayonunda, “Teleqüllə” ətrafında olan sürüşmədən sonra daha iki sürüşməyə meyilli zonanın aşkarlandığını deyib. O, bildirib ki, sürüşmə zonasında tədqiqatlar aparılır və bu proses uzun çəkəcək. Prosesin baş verməsini və istiqamətini müəyyən etmək, eləcə də onun qarşısını almaq üçün addımlar atılır.
Mərkəzin direktoru deyib: “İlk növbədə, bu ərazidə elmi tədqiqat işləri aparıb, prosesin səbəbini öyrənmək lazımdır. Sürüşmə ərazisinin ətrafında araşdırma aparılır, lakin üst hissədə tədqiqat aparmaq mümkün deyil. Çünki burada hələ sürüşmə prosesi davam edir. İlkin məlumata görə, Badamdarda sürüşmənin dərinliyi aşağı hissədə 46 metrə bərabərdir. Yuxarı hissədəki dərinlik hələ ki, bilinmir. Tədqiqatlar yekunlaşandan sonra nəticələr təqdim ediləcək”.
Q.Yetirmişli sürüşməyə Xəzərdə baş verən təkanların təsir etməsi məsələlərinə də toxunub. O, təkanların nisbətən təsir etdiyini bildirib. Ölkədə seysmik aktivliyin fon səviyyəsində olduğunu və zəif təkanların mütəmadi baş verdiyini deyən direktor bunun sürüşmə prosesinə güclü təsir etmədiyini də diqqətə çatdırıb.