Əcnəbi turistlər niyə Azərbaycanı seçir? - FOTOREPORTAJ VİDEO
“Şahdağ” Turizm Mərkəzində dincələn xarici qonaqlar bu suala cavab verir
Qusar, 31 dekabr, Elxan Yusifli, AZƏRTAC
Azərbaycana gələn əcnəbi turistlərin sayı ilbəil artır. Xarici qonaqların sayı ilə yanaşı, gəldikləri ölkələrin coğrafiyası da genişlənir. İndi Azərbaycanın istirahət mərkəzlərində Avropa, Asiya, Körfəz ərəb ölkələri , ABŞ, Kanada, hətta Uzaq Şərq ölkələrindən belə turistlərə rast gəlmək mümkündür. Bəs görəsən, ölkəmizdə əcnəbi turistləri cəlb edən əsas məqamlar hansılardır?
AZƏRTAC-ın bölgə müxbiri bu sualın cavabını “Şahdağ” Turizm Mərkəzində dincələn turistlərdən soruşub.
Azərbaycana Hindistandan gələn ailənin üzvləri səfərlərindən çox razı qaldıqlarını bildirirlər.
Hindistanlı tələbə Nidah Merchant deyib : “Mən Azərbaycana ailəmlə birlikdə gəlmişəm. Buranın çox gözəl təbiəti var, havası təmizdir. Bu, mənim Azərbaycana ilk səfərimdir. Kanadada, Birləşmiş Ərəb Əmirliklərinin (BƏƏ) Dubay şəhərində olmuşam. Azərbaycan həmin ölkələrdən fərqlidir. Müasir şəhərləriniz var. “Şahdağ” Turizm Mərkəzi də çox maraqlı, gözəl yerdir. Buradakı xidmətləri bəyəndim. Həmçinin xizək sürməyi öyrəndim. Azərbaycanda bir həftə qalacağıq və bunun iki gününü “Şahdağ”da dincələcəyik”.
Nidahın bacısı İnciya Merchant da ölkəmiz haqqında təəssüratlarını AZƏRTAC-la bölüşərək bildirib: “Azərbaycanlılar qonaqpərvər və yardımsevərdirlər. Mən də bacımla birlikdə Avropa ölkələrində, Kanadada və başqa yerlərdə olmuşam. Bu dəfə Azərbaycana gəlməyə qərar verdik. Yollarınız, şəhərləriniz səliqəlidir. Turistlər üçün maraqlı bir məkandır. Çox bəyəndim”.
“Şahdağ” Turizm Mərkəzində dincələn digər ailə isə Birləşmiş Ərəb Əmirliklərindən gəlib.
Müsahibimiz Yousef Hamood Alharbi Dubay şəhərində yaşayır. “Azərbaycanın turistik yerləri olduqca gözəldir. Ən əsası burada qar var. Ölkənizdə gözəl təbiət və mehriban insanlarla qarşılaşdıq. Azərbaycanda olduğum günlər yaddaşımda xoş anlar kimi qalacaq. Burada uzun müddət olmaq istərdim. Çox güman ki, yenə də gələcəyəm. Artıq üç gündür buradayıq. Ailəmlə gəlmişəm. Anam, bacım və mən. Gələn dəfə atam da bizimlə gələcək. O da bu gözəllikləri görməyə şad olacaq”, - deyə Yousef Hamood bildirib.
Azərbaycana ilk dəfə gəldiyini deyən Yousefin bacısı Tahani Alharbi bildirib: “Qardaşımın dediyi kimi, Dubaydan gəlmişik. İndi bizim ölkəmizdə hava çox istidir. Azərbaycana dincəlməyə və əylənməyə gəlmişik. Burada qar gördüyümə görə çox sevinirəm. Yenə də gələcəyəm. “Şahdağ” Turizm Mərkəzi haqqında dostumdan öyrənmişəm. Daha doğrusu, bizdən əvvəl burada olan dostum sosial şəbəkədə şəkil paylaşmışdı. Mən də sonradan ətraflı maraqlandım. “Şahdağ” haqqında öyrəndikdən sonra bura gəlmək barədə düşündük. Ailəmlə birlikdə qərar verib buraya gəldik. Əla yerdir”.
“Şahdağ” Turizm Mərkəzində yeddinci qış mövsümünə dekabrın 15-də start verilib. Mərkəzdə 15 kanat xətti, asma buraz yollar, xizəkçilik və snoubord mərkəzləri yerli və əcnəbi turistlərin xidmətindədir. Eyni zamanda, kurort ərazisində 24 saat fəaliyyət göstərən tibbi klinika, dağ xizəkçiliyi məktəbi, geniş avtomobil dayanacağı mövcuddur.
Bölmənin digər xəbərləri
