REGİONLAR
Qubada inşa olunan 960 şagird yerlik məktəb binası yeni tədris ilinə kimi istifadəyə veriləcək VİDEO
Quba, 9 aprel, Elxan Yusifli, AZƏRTAC
Quba rayonunun Alekseyevka kəndində 960 şagird yerlik yeni məktəb binası inşa olunur.
AZƏRTAC xəbər verir ki, üçmərtəbəli binada 40 sinif, 6 laboratoriya, gənclərin çağırışaqədər hazırlığı, əmək təlimi və kompüter otaqları, idman, akt, oxu zalları, kitabxana və 234 yerlik yeməkxana olacaq. 3500 kvadratmetr sahəni əhatə edən yeni binanın hazırda ikinci mərtəbəsi tikilir.
Kənddə təhsil ocağının inşasına ötən ilin dekabr ayından başlanılıb. Təhsil müəssisəsi müasir istilik və işıqlandırma sistemi ilə təchiz ediləcək. Yeni məktəb binasının həyətində qazanxana və su çənləri də tikiləcək.
Məktəb binasının tikintisinin yeni tədris ilinə kimi başa çatdırılması nəzərdə tutulub.
Rəhman Məmmədov adına Alekseyevka kənd tam orta məktəbində hazırda 840 şagird təhsil alır. Təhsil ocağında tədris Azərbaycan və rus dillərində aparılır.
Dörd min nəfərdən çox sakini olan Alekseyevka Qubanın ən böyük kəndlərindən sayılır.