28 May – Respublika Günü münasibətilə Rumıniyada qəbul təşkil edilib VİDEO
Buxarest, 28 may, AZƏRTAC
Azərbaycanın Rumıniyadakı səfirliyi 28 May - Respublika Günü və Azərbaycan diplomatik xidmət orqanlarının 100 illik yubileyi münasibətilə rəsmi qəbul təşkil edilib. Tədbirdə Rumıniya Baş Nazirinin müavini xanım Ana Birçall, Rumıniyanın keçmiş prezidenti Emil Konstantinesku, Rumıniya Deputatlar Palatasının Azərbaycanla dostluq qrupunun sədri Viktor-Paul Dobre, dövlət qurumlarının məsul şəxsləri, parlament üzvləri, siyasi partiyaların nümayəndələri, tanınmış iş adamları, aparıcı KİV nümayəndələri, mədəniyyət, elm, təhsil ocaqlarının rəhbərləri, bu ölkədə akkreditə olunmuş diplomatik korpusun və beynəlxalq təşkilatların təmsilçiləri, Rumıniyadakı türk və tatar icmalarının nümayəndələri, burada təhsil alan və yaşayan azərbaycanlılar iştirak ediblər.
AZƏRTAC xəbər verir ki, əvvəlcə Azərbaycan və Rumıniyanın dövlət himnləri səsləndirilib.
Azərbaycanın Rumıniyadakı səfiri Hüseyn Nəcəfov qonaqları salamlayaraq 1918-1920-ci illərdə mövcud olmuş Azərbaycan Xalq Cümhuriyyətinin yarana tarixindən, qısa dövr ərzində keçdiyi inkişaf prosesindən, siyasi, iqtisadi, mədəni, demokratik dövlət quruculuğu sahəsində aparılan islahatlardan danışıb. Azərbaycan Xalq Cümhuriyyətinin bütün dövlətçilik atributlarına sahib olduğunu qeyd edən diplomat həmçinin, ölkəmizdə ilk dəfə Xarici İşlər Nazirliyinin də o dövrdə yaradıldığını vurğulayıb.
Diplomat Azərbaycanın 1991-ci ildə yenidən öz müstəqilliyinə qovuşduqdan sonra ümummilli lider Heydər Əliyevin rəhbərliyi altında zəngin dövlətçilik ənənələrini bərpa və inkişaf etdirdiyini, bu siyasətin Prezident İlham Əliyev tərəfindən bu gün də uğurla davam etdirildiyini, müasir Azərbaycanın siyasi sabitliyə, dinamik iqtisadi inkişafa, praqmatik xarici siyasətə malik islahatçı və tolerant ölkə kimi tanındığını diqqətə çatdırıb.
H.Nəcəfov Azərbaycanda sosial-iqtisadi inkişafın bariz nümunəsi olaraq, cari il aprelin 6-da ölkəmiz üçün əlamətdar hadisənin baş verdiyini, Azərbaycanın 10 milyonuncu sakinin dünyaya gəldiyini qeyd edib. Səfir, Ermənistan silahlı qüvvələri tərəfindən torpaqlarımızın 20 faizinin işğal olunmasına, 1 milyondan çox soydaşımızın qaçqın və məcburi köçkün vəziyyətinə düşməsinə baxmayaraq, ölkəmizin iqtisadi, siyasi, sosial və diplomatiya sahəsində önəmli uğurlar əldə etdiyini nəzərə çatdırıb. H.Nəcəfov qarşılıqlı maraq doğuran bir çox sahələrdə çoxtərəfli əməkdaşlığın inkişaf etdirilməsinə nail olunduğunu və Azərbaycan-Rumıniya münasibətlərin strateji tərəfdaşlıq səviyyəsinə çatdığını vurğulayıb. Bu il ölkələrimizin Strateji Tərəfdaşlıq haqqında Sazişin imzalanmasının 10-cu ildönümünü qeyd etdiyini bildirən H.Nəcəfov, iki ölkə arasında münasibətlərin daha da genişləndirilməsi üçün böyük imkanların olduğunu vurğulayıb.
Sonra fəxri qonaq qismində Rumıniya Baş Nazirinin müavini xanım Ana Birçall çıxış edib.
Ana Birçall Rumıniya Baş Naziri xanım Viorika Dançilanın adından Azərbaycan xalqını bu əlamətdar gün münasibətilə təbrik edib. Azərbaycan və Rumıniya arasında diplomatik əlaqələrə toxunan A.Birçall, Rumıniyanın 1991-ci ildə Azərbaycanın müstəqilliyini tanıyan ilk dövlətlərdən biri olduğunu, bir neçə ay sonra isə iki ölkə arasında diplomatik əlaqələrin qurulduğunu bildirib. Azərbaycan-Rumıniya iqtisadi əlaqələrinin inkişafından bəhs edən Baş Nazirin müavini, cari il martın 4-də Buxarest şəhərində keçirilmiş Xəzər dənizi - Qara dəniz beynəlxalq nəqliyyat marşrutu üzrə Azərbaycan, Gürcüstan, Rumıniya və Türkmənistanın xarici işlər nazirlərinin dördtərəfli görüşünü yüksək qiymətləndirib.
A.Birçall, eyni zamanda, Azərbaycan Respublikası Hökuməti və Rumıniya Hökuməti arasında ticarət-iqtisadi əlaqələr və elmi-texniki əməkdaşlıq üzrə Müştərək Komissiyanın fəaliyyətini ölkələr arasında sözügedən sahələr üzrə əlaqələrin dərinləşməsinə təkan verdiyini qeyd edib. A.Birçall enerji, nəqliyyat, turizm və təhsil sahəsində əlaqələrin genişləndirilməsinin Rumıniya hökuməti qarşısında duran prioritet məsələlərdən olduğunu vurğulayıb. Dəfələrlə Azərbaycanda rəsmi və işgüzar səfərlərdə olduğunu, Prezidenti İlham Əliyev tərəfindən qəbul edildiyini məmnunluqla qeyd edən Ana Birçall bunu ölkələrimiz arasında dost münasibətlərinin bariz nümunəsi kimi dəyərləndirib. O, Azərbaycanın Rumıniyanın 14 Strateji Tərəfdaşından biri olduğunu bildirərək ölkələrimiz arasında əlaqələrin daha da genişlənməsi və dərinləşməsi istiqamətində səylərini əsirgəməyəcəyini vurğulayıb. Rəsmi qəbul zamanı “İrs” jurnalının Azərbaycan Respublikasının Diplomatik Xidmət orqanlarının 100 iliyinə həsr olunmuş buraxılışı və rumın dilində ölkəmizin tarixi və mədəniyyəti ilə bağlı müxtəlif kitablar və broşürlər qonaqlaratəqdim olunub. Qəbulda Azərbaycanda keçirilən beynəlxalq tədbirlərlə bağlı, eləcə də ölkəmizin tarixini, mədəniyyətini, iqtisadiyyatını, turizmini tərənnüm edən videoçarxlar nümayiş etdirilib, milli mahnılarımız səsləndirilib, qonaqlara Azərbaycan milli mətbəxinin təamları təqdim olunub.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
