İDMAN
2003-CÜ İL SUMQAYIT İDMANÇILARI ÜÇÜN UĞURLU OLMUŞDUR
Şəhər İcra hakimiyyətinin başçısı Vaqif Əliyev idmançıları təbrik etmiş, onların nailiyyətlərindən razı qaldığını bildirərək demişdir ki, bütün bunlar əsası ümummilli liderimiz, unudulmaz Heydər Əliyev tərəfindən qoyulmuş idmanın inkişafı proqramının uğurla həyata keçirilməsinin nəticəsidir. Məhz onun uzaqgörən siyasəti, daimi qayğısı nəticəsində idman respublikanın həyatında öncül yerlərdən birini tutmuşdur. İlham Əliyevin 1997-ci ildə Milli Olimpiya Komitəsinin prezidenti seçilməsi idmanın inkişafına yeni təkan vermişdir. Ölkəmizdə idmanın sürətlə inkişafı, belə qısa müddətdə çoxlu idman kompleksinin və bazasının tikilməsi Azərbaycanın idman ölkəsi kimi tanınmasına səbəb olmuşdur. Respublikamız neft ilə yanaşı, idmanla da məşhurlaşmağa başlamış, İlham Əliyev Azərbaycan gənclərinin liderinə çevrilmişdir.
İcra hakimiyyətinin başçısı qazanılmış uğurlarda məşqçilərin də böyük rolunu vurğulamışdır. Sumqayıtlıların bu il müxtəlif beynəlxalq idman yarışlarında 369 medal, o cümlədən 142 qızıl medal qazanmasında onların da xidməti var. Şəhərin hələlik iki idmançısı – Elnur Aslanov (sərbəst güləş) və İlham Zəkiyev (cüdo, paralimpiya oyunları) növbəti Olimpiya oyunlarına lisenziya qazanmışlar.
V.Əliyev Sumqayıt şahmat məktəbinin yüksək nailiyyətlərindən söhbət açarkən dünya şahmat aləmində bənzəri olmayan məşhur Məmmədyarovlar ailəsindən danışmışdır. Bir ailədən üç uşaq – Zeynəb, Şəhriyar və Türkan öz yaş dərəcələrində maksimum nəticə əldə etmişlər. Onların uğurunda məşqçi ata Həmid Məmmədyarovun da payı vardır.
Şəhər Gənclər, İdman və Turizm İdarəsinin rəisi Musa Həsənov, kikboksinq üzrə dünya və Avropa çempionu Emil Süleymanov, idman sülaləsinin başçısı, güləş üzrə əməkdar məşqçi Əhməd Rəcəbov və boks üzrə əməkdar məşqçi Eldar Əbilov görüşdə çıxış edərək, son zamanlar şəhərdə aparılan yenidənqurma işlərindən razılıqla söhbət açmış, onlara göstərilən qayğıya görə şəhər rəhbərliyinə minnətdarlıqlarını bildirmişlər. Şəhər İcra Hakimiyyəti başçısının sərəncamına əsasən, daha çox fərqlənmiş 9 idmançı 2004-cü ildə hər ay xüsusi təqaüd alacaqdır.
Sonda idmançılara və məşqçilərə gül dəstələri və pul mükafatları təqdim olunmuşdur.