Bakı, 28 dekabr, AZƏRTAC

Başa çatmaqda olan 2018-ci il Azərbaycan Velosiped İdmanı Federasiyası üçün kifayət qədər məhsuldar olub. Federasiya tərəfindən təşkil edilən maarifləndirici tədbirlər və layihələr təkcə yeniyetmə və gənclərdə deyil, eyni zamanda, daha yuxarı yaş qrupuna aid insanlar arasında da velosipedə marağı xeyli artırıb.

AZƏRTAC xəbər verir ki, dekabrın 28-də ilin yekunlarına həsr olunan tədbirdə federasiyanın birinci vitse-prezidenti, Avropa Velosipedçilər Birliyi Rəhbər Komitəsinin üzvü Sahib Ələkbərov görülən işlər barədə məlumat verib. Vitse-prezident qeyd edib ki, ötən il Samir Cəbrayılov, Kiril Pozdnyakov, Sergey Omelçenko, Musa Mikayılzadə, Yelena Pavluxina, Kərim Şirəliyev və Viktoriya Sidorenko kimi idmançılarımız bir sıra nüfuzlu beynəlxalq yarışlarda uğurlu nəticələr əldə ediblər. Ölkəmizdə baş tutan idman yarışlarında, xüsusən də iyunda Bakıda təşkil olunan BMX üzrə dünya çempionatının keçirilməsində Gənclər və İdman Nazirliyinin və Milli Olimpiya Komitəsinin dəstəyini hər zaman hiss etdiklərini xüsusi vurğulayan federasiya rəsmisi bu işlərdə əməyi olanlara minnətdarlığını bildirib.

Daha sonra AzVİF-in baş katibi, Beynəlxalq Velosipedçilər İttifaqının Yaxın Şərq və Asiya ölkələri üzrə texniki nümayəndəsi Fərhad Əliyev başa çatmaqda olan il ərzində idmançılarımızın beynəlxalq yarışlarda əldə etdiyi nəticələr barədə məlumat verib.

O vurğulayıb ki, 2018-ci ilin əsas idman hadisəsi iyunda ölkəmizin velosiped idmanının BMX növü üzrə (Olimpiya idman növü) dünya çempionatına ev sahibliyi etməsi olub. Azərbaycan Prezidenti İlham Əliyevin birbaşa diqqət və qayğısı ilə bu yarış ən yüksək səviyyədə baş tutub. Planetin müxtəlif ölkələrindən 1500-dən artıq idmançının iştirak etdiyi dünya çempionatının təşkilatçılıq səviyyəsi Beynəlxalq Velosipedçilər İttifaqı (UCI) tərəfindən olduqca yüksək qiymətləndirilib. Yarış 50-dən çox ölkədə canlı yayımlanıb. Turniri izləmək üçün ölkəmizə gələn UCI prezidenti David Lappartien Prezident İlham Əliyev ilə görüşündə ölkəmizdə bütün beynəlxalq idman tədbirlərinin uğurla keçirilməsindən, BMX üzrə dünya çempionatının da ən yüksək standartlar səviyyəsində təşkil olunmasından məmnunluğunu ifadə edib və bütün bunlara görə Azərbaycan Prezidentinə minnətdarlığını bildirib.

Qeyd olunub ki, 2018-ci ildə Azərbaycanın şose velosipedi üzrə yeniyetmə və gənclərdən ibarət yığma komandalarının üzvləri dünya və Avropa çempionatları ilə yanaşı, bir sıra beynəlxalq turnirlərdə də iştirak ediblər. Mayda Türkiyənin Ordu şəhərində təşkil olunmuş açıq çempionatda yeniyetmə qızların kriterium yarışında idmançımız Viktoriya Sidorenko fəxri kürsünün ən yüksək pilləsində yer alıb. Heyəti Nəcəf Bağırov, Xankişi İsgəndərov, Qadir Mustafayev, Şahin Eyvazov, Əli Qurbanov və Mahmud Məmmədovdan ibarət olan gənclər yığmamız isə qrup və kriterium ötüşmələrinin yekununda komanda hesabında bürünc medala layiq görülüblər. İyulda qardaş ölkənin Kastamonu şəhərində keçirilən beynəlxalq turnir də idmançılarımızın uğurlu çıxışı ilə yadda qalıb. Yarışın gənclər kateqoriyasında fəxri kürsün hər üç pilləsində Azərbaycan velosipedçiləri qərarlaşıblar. Yüz kilometrlik marşrutu Mahmud Məmmədov hamıdan tez qət edərək finiş xəttini birinci keçib. Yığmamızın digər üzvləri İvan Orlov və Xankişi İsgəndərov isə müvafiq olaraq, 2-3-cü yerləri tutublar. Yığmamız komanda hesabında da qalib olub.

Bildirilib ki, heyətində elit və U-23 yığma komandalarımızın üzvlərinin yer aldığı “Synergy Baku Cycling Project” kontinental komandasının üzvləri də il ərzində beynəlxalq turnirlərdə uğurla çıxış ediblər. Kiril Pozdnyakov Türkiyədə Alanya Qran-Prisinin, Mersin turunun 1-ci mərhələsinin, Rusiyada “Moskvanın 5 halqası” yarışının 4-cü mərhələsinin, Belçikada “Dentergem” yarışının qalibi olub. Digər nüfuzlu yarışlarda Samir Cəbrayılov, eləcə də Kiril Pozdnyakov mükafata layiq yerlər tutublar. Martda Türkiyədə keçirilən Side Qran-Prisində “Synergy Baku” komanda hesabında birinci yerdə qərarlaşıb. Dekabrın əvvəllərində Portuqaliyada keçirilən trek velosipedi üzrə ənənəvi “Prova Internacional Municipo de Anadia” turnirində yığma komandamızın üzvü Sergey Omelçenko uğurlu nəticə ilə yadda qalıb. Beynəlxalq Velosipedçilər İttifaqının birinci kateqoriyalı yarışında təmsilçimiz keyrin növündə bürünc medala layiq görülüb və 2020-ci ildə keçiriləcək Tokio Olimpiadasına lisenziya almaq üçün öz hesabına 160 xal yazdırıb. Azərbaycan Velosiped İdmanı Federasiyası və Beynəlxalq Velosipedçilər İttifaqı arasında şose velosipedi üzrə U-23 yığma komandamızın üzvləri Musa Mikayılzadə və Kərim Şirəliyevin İsveçrədəki Dünya Velosiped Mərkəzində altı aylıq təcrübə keçməsi barədə razılıq əldə olunub. İdmançılarımız 2019-cu ilin yanvarından iyulunadək burada hazırlıq proseslərində iştirak edəcək və Dünya Velosiped Mərkəzinin yeni formalaşdırılmış komandasının heyətində yarışlarda iştirak etməklə ustalıqlarını artıracaqlar.

Qeyd edilib ki, ilin son günlərində Azərbaycan Velosiped İdmanı Federasiyası BMX velosipedi üzrə dünya çempionatının yüksək təşkilatçılığına görə təltif olunub. Gənclər və İdman Nazirliyinin ilin ən yaxşılarının adlarını açıqladığı tədbirdə federasiya “İdman yarışlarının yüksək səviyyədə təşkili və keçirilməsinə görə” xüsusi mükafata layiq görülüb.

Daha sonra AzVİF-in birinci vitse-prezidenti Sahib Ələkbərov əldə olunmuş uğurlarla yanaşı, mövcud olan bəzi çatışmazlıqları da tədbir iştirakçılarının diqqətinə çatdırıb. İdmanda dopinqə qarşı mübarizənin daha da gücləndirilməsinin vacibliyindən danışan S.Ələkbərov uğurlu nəticələrin təmiz mübarizə şəraitində qazanılması üçün Azərbaycan Milli Antidopinq Agentliyi ilə sıx əməkdaşlıq edildiyini, dopinqdən istifadənin ümumiyyətlə, xüsusən də yeniyetmələr arasında yolverilməz olduğunu, bu sahədə ciddi məlumatlandırma və maarifləndirmə tədbirləri aparmalı olan məşqçilər korpusunun üzərinə böyük məsuliyyət düşdüyünü vurğulayıb. O qeyd edib ki, hazırda federasiyanın qarşısında duran əsas məqsəd Respublika Velotreki və BMX Veloparkı kimi mövcud idman qurğularından daha səmərəli istifadə etmək, yeniyetmə və gəncləri diqqət mərkəzində saxlamaqla onların inkişafına nail olmaq, klub və cəmiyyətlərin fəaliyyətini daha da gücləndirməkdir. Bu istiqamətdə Respublika Olimpiya Velosiped Məktəbinin fəaliyyəti müsbət nümunə kimi göstərilib.

2019-cu il üçün əsas prioritet istiqamətlərdən birinin “Tokio-2020”yə lisenziya xallarının toplanması olacağını diqqətə çatdıran S.Ələkbərov artıq həm şose, həm də trek velosipedində dördilliyin zirvə yarışına lisenziya xalları verən yarışlar silsiləsinin start götürdüyünü və prosesin ilin sonunadək davam edəcəyini, bir neçə velosipedçimizin şanslarının yüksək olduğunu bildirib.

Tədbirin sonunda il ərzində fərqlənmiş idmançılardan Ayan Xankişiyeva, Nəcəf Bağırov, Nikita Sitov, Viktoriya Sidorenko və Sergey Omelçenko, məşqçilərdən Əbülfəz Məmmədov, Aleksey Qorikov və digərləri, həmçinin AzVİF ilə yaxından əməkdaşlıq edən qurumların nümayəndələrinə federasiyanın mükafatları təqdim edilib.