2050-ci ilə qədər dünya əhalisinin 70 faizi şəhərlərdə yaşayacaq
Bakı, 14 may, AZƏRTAC
Bu gün dünya əhalisinin 55 faizindən çoxu şəhərlərdə yaşayır və proqnozlara görə, bu rəqəm 2050-ci ilə qədər təxminən 70 faizə çatacaq. Bu gün iqlim miqrasiyası ətrafında müzakirələr əvvəlkindən daha da aktuallaşır. Dünya Bankının proqnozlarına görə, kifayət qədər iqlim və inkişaf tədbirləri görülmədikdə, 2050-ci ilə qədər iqlim təsirləri 216 milyondan çox insanı ölkə daxilində köçməyə məcbur edə bilər. Bu məsələ xüsusilə su çatışmazlığı və ətraf mühitin deqradasiyası ilə üzləşən regionlar üçün vacibdir.
AZƏRTAC xəbər verir ki, bu sözləri Azərbaycan Prezidentinin iqlim məsələləri üzrə nümayəndəsi Muxtar Babayev “Bakı Şəhərsalma Həftəsi” çərçivəsində Qlobal Cənub QHT Platformasının ilk Baş Assambleyasında çıxışı zamanı deyib.
Regionumuz üçün həyati əhəmiyyət daşıyan Xəzər dənizinin iqlim dəyişmələrinin ciddi nəticələri ilə üzləşdiyini vurğulayan Muxtar Babayev son illərdə dənizin su səviyyəsinin azalmasının kəskin sürətləndiyini, bunun da ekosistemlər, nəqliyyat əlaqələri və regional infrastruktur üçün artan ekoloji, iqtisadi və sosial risklər yaratdığını qeyd edib.
Bölmənin digər xəbərləri
