20 Yanvar faciəsi Azərbaycan tarixində qanla yazılmış bir səhifədir
Bakı, 21 yanvar (AZƏRTAC). Azərbaycan Milli Elmlər Akademiyasının (AMEA) Torpaqşünaslıq və Aqrokimya İnstitutunda 20 Yanvar faciəsinin 24-cü ildönümünə həsr olunmuş anma tədbiri keçirilmişdir.
Akademiyadan AZƏRTAC-a bildirmişlər ki, əvvəlcə şəhidlərimizin xatirəsi bir dəqiqəlik sükutla yad edilmişdir.
Tədbirdə institutun direktoru, AMEA-nın müxbir üzvü Məhərrəm Babayev çıxış edərək uzun illər sovet imperiyasının tərkibində yaşamış bir xalqın azadlıq uğrunda mübarizə qüdrətindən söz açmışdır. Bildirilmişdir ki, Azərbaycanın müstəqilliyi, ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 1990-cı il yanvarın 19-dan 20-nə keçən gecədə ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucalmışlar.
Anma mərasimində institutun həmkarlar ittifaqı təşkilatının sədri, fəlsəfə üzrə elmlər doktoru Məmməd Məmmədov qanlı faciənin siyasi mahiyyətindən, qəhrəman Vətən övladlarının Azərbaycanın müstəqilliyi uğrunda apardıqları mübarizədən danışmışdır. Qeyd edilmişdir ki, insan hüquq və azadlıqlarının kütləvi pozulması ilə nəticələnən həmin faciə XX əsirdə insanlığa qarşı törədilən ən dəhşətli cinayətdir. Qırmızı imperiyanın silahlı dəstələri Azərbaycanın ərazi bütövlüyü uğrunda mübarizəyə qalxmış qəhrəman oğul və qızlarımızın azadlıq əzmini qıra bilməmişlər.
Tədbirdə çıxış edən tarix üzrə elmlər doktoru, professor Qasım Hacıyev 20 Yanvar hadisələri haqqında məlumat verərək həmin tarixin Azərbaycan xalqının həyatında və yaddaşında dönüş nöqtəsi kimi qalacağını bildirmişdir. O, 20 Yanvarı tariximizin təkcə qan yaddaşı kimi deyil, hər bir azərbaycanlının istiqlal ruhunun ilk zirvəsi, milli məfkurəmizin azadlıq istəyinin oyanışı kimi də səciyyələndirmişdir.
Bölmənin digər xəbərləri
