20 YANVAR FACİƏSİ XALQIMIZIN QAN YADDAŞINDAN SİLİNMƏYƏCƏKDİR
Bakı, 18 yanvar (AZƏRTAC). Azərbaycan Dövlət İqtisad Universitetində (ADİU) 20 Yanvar - Ümumxalq hüzn günü ilə əlaqədar toplantı keçirilmişdir.
Müstəqilliyimiz və azadlığımız uğrunda canlarından keçmiş şəhidlərin xatirəsi bir dəqiqəlik sükutla yad edildikdən sonra 20 Yanvar faciəsinə həsr olunmuş videoçarx nümayiş olunmuşdur.
Universitetin rektoru, Milli Məclisin Elm və Təhsil Komitəsinin sədri Şəmsəddin Hacıyev iyirmi il əvvəl Bakıda törədilmiş soyqırımı, faciənin mahiyyəti barədə danışmışdır. Bildirmişdir ki, bu faciə Azərbaycanın və bütövlükdə türk dünyasının faciəsidir. 1990-cı il yanvarın 19-dan 20-nə keçən gecə sovet qoşunları Bakıya yeridilərək dinc əhaliyə divan tutmuş, qırğınlar törətmişdir. O müdhiş gecədə əliyalın insanlara, o cümlədən uşaqlara və qocalara qarşı qəddarlıq göstərilmiş, günahsız qanlar tökülmüşdür. Həmin gün xalqımız böyük faciə ilə üzləşsə də, özünün Vətənə, torpağa sədaqətini, qəhrəmanlığını, azadlıq, müstəqillik uğrunda mübarizliyini, sarsılmazlığını bütün dünyaya sübut etdi. 20 Yanvar faciəsi başda M.Qorbaçov olmaqla, ermənipərəst sovet rəhbərliyinin Azərbaycana qarşı məkrli niyyətini bir daha açıb göstərdi. Hadisədən dərhal sonra xalqımızın böyük oğlu, dünya şöhrətli siyasətçi Heydər Əliyev özünün və ailə üzvlərinin həyatı üçün təhlükəyə baxmayaraq, Azərbaycanın Moskvadakı daimi nümayəndəliyinə gələrək imperiyanın əsl niyyətlərini bütün dünyaya bəyan etdi. Ulu öndər xalqın təkidli tələbi ilə hakimiyyətə qayıdandan sonra bu qanlı aksiyaya siyasi-hüquqi qiymət verildi. İyirmi il əvvəl öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucalmışlar. 20 Yanvar faciəsi Azərbaycan xalqının azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi yazılmışdır.
Çıxış edənlər baş vermiş faciədə o vaxtkı SSRİ rəhbərləri ilə yanaşı, Azərbaycan rəhbərlərini də lənətləmiş, onların hələ də layiqli cəza almamasından hiddətləndiklərini bildirmişlər.
Yığıncaqda 20 Yanvar, Qarabağ müharibəsi şəhidlərinin qanı ilə qazanılan azadlıq və müstəqilliyimizin dönməzliyindən, bu gün Azərbaycanın fəth etdiyi yüksək zirvələrdən iftixarla söz açılaraq faciə qurbanlarının əziz xatirəsinin əsrlər boyu qəlblərdə yaşayacağı dönə-dönə vurğulanmışdır.
Sonda şəhid ailələrinə maddi yardım paylanmışdır.
Bölmənin digər xəbərləri
